Kóksý qant zaýytynyń direktory Altynbek Abatovtyń aitýynsha, birinshi kúni zaýytqa 100 tonnaǵa jýyq ónim ákelingen. Alǵashqy bolyp ónim jetkizgen sharýa qojalyqtary keshke deiin taǵy 2-3 reis jasaǵan. Qyzylshadaǵy qant mólsheri 12-13 paiyzdy quraidy, kún sýi bastaǵanda bul kórsetkish arta túsedi. Ónimdi óńdeý 15 qyrkúiekten bastalyp, 220-250 tonna qant qyzylshasy óńdelmek.
Qant zaýytyna ónim ákelgenderdiń biri – Rahadyr Doǵdyrbek. Kóksý stantsiiasynda qyzylsha jinaýdy bastaǵan «Meke» sharýa qojalyǵynyń basshysy qazir ónim jinaýǵa 30 adam jumyldyrylǵanyn aitty. Aýa raiy qolaily bolsa, egin qyrkúiek aiynyń sońyna deiin jinalyp bitedi.
Rahadyr Doǵdyrbek aýyl sharýashylyǵymen 2012 jyldan beri ainalysyp keledi. Ol 50 gektar egistik jeriniń 15 gektaryna biyl qant qyzylshasyn sepken. Sharýa qojalyǵynyń tátti túbir ósirýge den qoiǵanyna 8 jyl bolypty.
– Bastapqyda 5 gektarǵa seýip bastaǵanmyn. Qazir 15 gaktarǵa jetkizdim. Bul daqyldy kútip-baptai bilseń, soǵan sai ónimi de joǵary bolady, – deidi sharýa.
Qaratal aýdanynda qant qyzylshasyn jinaýǵa alǵashqylardyń biri bolyp «Bekmurzaev» sharýa qojalyǵy kiristi. Bul qojalyq 2015 jyldan bastap Qanabek aýylynda jumys istep tur. Basshysy Berik Shegebaevtyń aitýynsha, 10 gektar sýarmaly jerdiń 6 gektaryna qant qyzylshasy egilgen. Biyl sýarmaly sý jetkilikti bolǵandyqtan ónim de mol shyqqan, ár gektarynan 700 tsentnerden ainalýda.
Alqapta qyzylsha jinaýda 20 adam eńbek etedi. Qazir qojalyq jetekshisi qyzylsha jinaityn kombain satyp alýdy josparlap otyr. Ol úsh uly da ózimen birge alqapta jumys isteitinin, kóliktiń kez kelgen túrin júrgize alatyndaryn aitady. Iaǵni, olardyń tehnikanyń tilin túsinip, jumysty sátti jalǵastyra alatyndaryna senimdi.
Eske salsaq, osy jyly Kóksý aýdanynda 114 sharýa qojalyǵy 1881 gektarǵa, al Qaratal aýdanynda 75 sharýa qojalyǵy 1106,7 gektarǵa qant qyzylshasyn ekken. Al jalpy oblys boiynsha biyl 8100 gektar alqapqa qyzylsha sebý josparlansa, bul kórsetkish 8742 gektardy qurady. Óńirde 370 myń tonna tátti túbir jinalyp, 62 myń tonna qant óndiriledi dep kútilýde.
