استانادا وتەتىن 5 دۇنيەجۇزىلىك كوشپەندىلەر ويىندارى قارساڭىندا كوكپاردان قازاقستان ۇلتتىق قۇراماسى الماتى وبلىسىندا وقۋ-جاتتىعۋ جيىندارىن وتكىزىپ جاتىر، – دەپ حابارلايدى Dalanews.kz.
ۇلتتىق قۇرامانىڭ باس باپكەرى اقىلباي مانكەيەۆتىڭ ايتۋىنشا، وسى وقۋ-جاتتىعۋ جيىنى اياسىندا قىركۇيەكتە وتەتىن ويىندارعا قاتىساتىن جىلقىلاردى شاباندوزدار باپتاپ جاتقانىن العا تارتتى. كوكپارعا 40 جىلقىنىڭ ىشىنەن مىقتىلارى ىرىكتەلىپ الىنعان.
ونىڭ سوزىنشە، كوماندا دايىندىعى ءقازىر جوعارى دەڭگەيدە. ۇلتتىق قۇراماعا قىرعىزستان مەن وزبەكستاننان كەلگەن كوماندالار مىقتى قارسىلاس بولا الادى.
– ەكى ايدان بەرى 5ء-شى دۇنيەجۇزىلىك كوشپەندىلەر ويىندارىنا بەلسەندى دايىندالۋدامىز. ەلىمىزدىڭ نامىسىن ابىرويمەن قورعاۋعا بار كۇشىمىزدى سالامىز. وسىنداي ماڭىزدى سپورتتىق جارىستىڭ ەلىمىزدە ءوتىپ جاتقانى بىزگە ۇلكەن جاۋاپكەرشىلىك جۇكتەيدى. ءبىرىنشى وقۋ-جاتتىعۋ جيىنىندا ءوزىمىزدىڭ كۇش-قايراتىمىزعا باسا ءمان بەرسەك، ەندى جىلقىلاردى دايىنداپ جاتىرمىز، – دەدى كوكپاردان ۇلتتىق قۇراما مۇشەسى ادىلەت مامىت.
ەستەرىڭىزگە سالا كەتەيىك، رەسپۋبليكالىق كوكپار فەدەراسياسى ۇلتتىق سپورت تۇرلەرى قاۋىمداستىعىنىڭ قۇرامىنا كىرەدى. سونىمەن قاتار، قاۋىمداستىق قۇرامىندا بايگە، جامبى اتۋ، اۋدارىسپاق، ساداق اتۋ، قۇسبەگىلىك، اسىق اتۋ، تەڭگە ءىلۋ، JORYQ جانە ت.ب. فەدەراسيالار بار. ال قاۋىمداستىقتى بەلگىلى كاسىپكەر، مەسەنات، Altyn Qyran Foundation قوعامدىق قورى قامقورشىلىق كەڭەسىنىڭ ءتوراعاسى يسلامبەك سالجانوۆ باسقارادى.
