سوت بارىسىندا تەرگەۋشىنىڭ ايىپتالۋشى اركاديي كلەبانوۆقا مەديسينالىق سيپاتتاعى ماجبۇرلەۋ شارالارىن قولدانۋ تۋرالى قاۋلىسى قارالدى.
ءبىرقاتار جابىرلەنۋشىنىڭ تاراپىنان سوتتى جابىق وتكىزۋ تۋرالى ءوتىنىش تۇسكەنى بەلگىلى بولدى.
"سوت اتالعان ادامدار مەن ولاردىڭ وتباسى مۇشەلەرىنىڭ جەكە ومىرىنە قاتىستى مالىمەتتەردىڭ جاريا ەتىلۋىنە جول بەرمەۋ قاجەتتىگىن ەسكەرە وتىرىپ، وسى وتىنىشتەردى قاناعاتتاندىردى. بۇدان ءارى سوت تالقىلاۋى جابىق رەجيمدە جۇرگىزىلەتىن بولادى"، – دەپ حابارلادى سوتتىڭ باسپا ءسوز قىزمەتى.
ايتا كەتەلىك، الماتىدا 14 قىركۇيەكتە جۋرناليستەرگە شابۋىل ءىسى بويىنشا سوت پروسەسى باستالدى. زارداپ شەككەندەردىڭ اراسىندا جۋرناليست سامال يبرايەۆا، YouTube بلوگەر باديم بارەيكو، سونداي-اق جۋرناليستەر مەن قوعام بەلسەندىلەرى گۇلنار باجكەنوۆا، گۇلجان ەرعالييەۆا، دينارا ەگەۋبايەۆا جانە رومان ەگوروۆ بار.
ىشكى ىستەر مينيسترلىگىنىڭ حابارلاعانىنداي مۇنىڭ ارتىندا اركاديي كلەبانوۆ ەسىمدى قازاقستان ازاماتى تۇرعان. قازاق جۋرناليستەرىنە قاستاندىق جاساۋدى كوزدەگەن كلەبانوۆقا قىلمىستىق كودەكستىڭ 115-بابى «قورقىتۋ»، 147-بابى «جەكە ومىرگە قول سۇعىلماۋشىلىقتى بۇزۋ»، 158-بابى «جۋرناليستىك قىزمەتكە كەدەرگى جاساۋ»، 202-بابى «بوتەننىڭ مۇلكىن قاساقانا جويۋ نەمەسە ءبۇلدىرۋ» جانە 293-بابى «بۇزاقىلىق» بويىنشا قىلمىس جاسادى دەگەن ايىپ تاعىلىپ وتىر.
«ءوزىنىڭ زاڭسىز جوسپارلارىن جۇزەگە اسىرۋ ءۇشىن كلەبانوۆ-مانيەۆيچ حاكەرلەر مەن ارەكەتتەردى ورىنداۋشىلار توبىن جالدادى. ول ارانداتۋشىلىقتىڭ ماقساتتارى مەن نۇسقالارىن ءوزى تاڭدادى. ول كريپتوۆاليۋتامەن وپەراسيالاردان تۇسكەن پايدادان ورىنداۋشىلارعا قالاماقى تولەدى”، – دەلىنگەن ءىىم حابارلاماسىندا.
جاۋاپ الۋ كەزىندە ول شابۋىلدى ءوز بەتىنشە ۇيىمداستىرعانىن، سەبەبى قازاقستاندىق ءبىرقاتار ب ا ق وكىلدەرىنە بۇرىننان كەلە جاتقان تالابى بار ەكەنىن ايتقان.
