ءماجىلىس دەپۋتاتى جۇلدىز سۇلەيمەنوۆا “عىلىم ورداسى” قۇرامىنا كىرەتىن ورتالىق عىلىمي كىتاپحانا، قازاقستان عىلىمى تاريحى مۋزەيى، ارحەولوگيا جانە تابيعات مۋزەيلەرى، سونداي-اق عىلىمي ءارحيۆتىڭ الەۋمەتتىك ماسەلەلەرى بويىنشا دەپۋتاتتىق ساۋال جولدادى، دەپ حابارلايدى Dalanews.kz.
سۇلەيمەنوۆا اتالعان سالا بويىنشا ءبىرقاتار ماسەلەنى اتادى.
"قازىرگى تاڭدا ورتالىق عىلىمي كىتاپحانادا 5،8 ميلليوننان استام بىرەگەي باسىلىم، XV-XVIII عاسىرلارعا جاتاتىن 20 مىڭ قولجازبا جانە 900 مىڭعا جۋىق عىلىمي كىتاپ ساقتالعان. بۇل – ەلدىڭ زياتكەرلىك قازىناسى. الايدا كىتاپحانانىڭ كليماتتىق جۇيەسى ىستەن شىققان: قىستا بولمەلەر سۋىق، جازدا ىلعال جوعارى. سونىڭ سالدارىنان تاريحي قۇندى كىتاپتار ءبۇلىنىپ، بەتتەرى ۇگىتىلە باستاعان. بۇعان قوسا، كىتاپحانا قىزمەتكەرلەرىنىڭ جالاقىسى تىم تومەن: 20 جىلدىق تاجىريبەسى بار ماماندار بار بولعانى 100 مىڭ تەڭگە ەڭبەكاقى الادى. وزگە كىتاپحانالاردا جالاقى كەزەڭ-كەزەڭىمەن ءوسىپ جاتقانىمەن، “عىلىم ورداسى” قۇرامىندا بولعاندىقتان، بۇل مەكەمەلەرگە مۇنداي وزگەرىستەر جەتپەي وتىر"، - دەپ اشىندى دەپۋتات.
ەسكە سالايىق، بۇعان دەيىن دەپۋتات جۇلدىز سۇلەيمەنوۆا بيۋدجەتتىك مەكەمەلەردەگى تەحنيكالىق قىزمەتكەرلەردىڭ — ەدەن جۋۋشى، سانتەحنيك، ەلەكتريك، اۋلا سىپىرۋشى سياقتى جۇمىسشىلاردىڭ ەڭبەگىن ءادىل باعالاپ، جالاقىسىن ارتتىرۋعا باعىتتالعان ءبىرىڭعاي جۇيە ەنگىزۋ قاجەت ەكەنىن اتاپ وتكەن ەدى.
دەپۋتات پرەمەر-مينيستردىڭ ورىنباسارى تامارا دۇيسەنوۆاعا دەپۋتاتتىق ساۋال جولداپ، ماڭىزدى ماسەلەنى كوتەردى.
ايتۋىنشا، سوڭعى جىلدارى ازاماتتىق قىزمەتكەرلەردىڭ ەڭبەكاقىسى جىل سايىن ورتا ەسەپپەن 20%-عا ءوسىپ كەلەدى. الايدا بۇل ءوسىم وڭىرلەر مەن اۋدانداردا بىركەلكى ەمەس، ءتىپتى ءبىر قالاداعى مەكەمەلەر اراسىندا دا ايىرماشىلىق بار. بۇل جاعداي تەحنيكالىق قىزمەتكەرلەر اراسىندا تۇسىنىسپەۋشىلىك تۋعىزۋدا.
وسى تۇستا، دەپۋتات جالاقىنىڭ ادىلەتتى ءبولىنۋىن قامتاماسىز ەتۋ ءۇشىن ءبىرىڭعاي جۇيە ەنگىزۋ قاجەت ەكەنىن اتاپ ءوتتى.
سونىمەن قاتار ول جوندەۋ جۇمىستارى ءۇشىن قوسىمشا تولەم قاراستىرىلمايتىنىن دا قوستى. ونىڭ ايتۋىنشا، بۇل ماقساتقا بيۋدجەتتەن قاراجات بولىنگەنىمەن، قاراپايىم جۇمىسشىلارعا قوسىمشا مىندەت جۇكتەلەدى.
“بۇل – ەڭبەك زاڭناماسىنا قايشى. ەگەر بيۋدجەتتە قاراجات قاراستىرىلعان بولسا، تەحنيكالىق قىزمەتكەرلەرگە جوندەۋ جۇمىستارى ءۇشىن ءتيىستى تولەم تولەنۋى ءتيىس”، – دەدى ول.
ونىڭ سوزىنشە، كەي جۇمىستارعا قوسىمشا اقى تولەنبەيدى.
"تاعى ءبىر وزەكتى ماسەلە – حلور قولداناتىن جۇمىستار ءۇشىن قوسىمشا اقى تولەنبەيدى. بۇل ماسەلەگە قاتىستى ناقتى شەشىم قابىلدانباعان. سول سەبەپتى ونى جەدەل قاراستىرۋ قاجەت"، - دەپ قوستى ول.
ۇكىمەت دۇنيەجۇزىلىك بانكپەن بىرلەسىپ، ازاماتتىق قىزمەتكەرلەردىڭ ەڭبەكاقى جۇيەسىن جەتىلدىرۋ جۇمىستارىن جۇرگىزىپ جاتىر. الايدا بۇل وزگەرىستەر تەحنيكالىق پەرسونالعا قالاي اسەر ەتەتىنى ءالى بەلگىسىز.
“اقپاراتتىڭ جەتىسپەۋى جۇمىسشىلار اراسىندا تۇسىنىسپەۋشىلىك تۋعىزادى. جالاقىنى ارتتىرۋ تەتىگى اشىق ءتۇسىندىرىلىپ، ءبىرىڭعاي ەڭبەكاقى جۇيەسى ەنگىزىلۋى كەرەك”، – دەپ اتاپ ءوتتى دەپۋتات.
سونىمەن قاتار ول تەحنيكالىق قىزمەتكەرلەردىڭ اۋىر ەڭبەگىن ەسكەرە وتىرىپ، جالاقىنى ارتتىرۋ ادىستەمەسىنە ەڭبەك ءوتىلى، جۇمىس جۇكتەمەسى جانە اتقارىلاتىن جۇمىستىڭ كۇردەلىگى سياقتى فاكتورلار ەنگىزىلۋى ءتيىس ەكەنىن ايتتى.
