قىتايعا جاساعان رەسمي ساپارىنىڭ قورىتىندىسى بويىنشا وتكەن باسپا ءسوز ءماسليحاتىندا رەسەي پرەزيدەنتى ۆلاديمير پۋتين ۋكراينا پرەزيدەنتى ۆلاديمير زەلەنسكييمەن كەزدەسۋ وتكىزۋگە دايىن ەكەنىن ايتتى، دەپ حابارلايدى Dalanews.kz تاسس-قا سىلتەمە جاساپ.
ءپۋتيننىڭ سوزىنشە، زەلەنسكييمەن كەلىسسوز جۇرگىزۋ يدەياسىن وعان اقش پرەزيدەنتى دونالد ترامپ ۇسىنعان. وسىعان بايلانىستى رەسەي كوشباسشىسى زەلەنسكييدى ماسكەۋگە شاقىردى.
"ەگەر زەلەنسكيي دايىن بولسا، ماسكەۋگە كەلسىن. كەزدەسۋ وتەدى"، — دەدى پۋتين.
سونداي-اق رەسەي پرەزيدەنتى دونالد ترامپپەن كەزدەسۋدىڭ دە ءالى كۇن تارتىبىندە تۇرعانىن اتاپ ءوتتى.
"ازىرگە ناقتى مەرزىم بەلگىلەنبەدى، دايىندىق جۇرگىزىلىپ جاتقان جوق. دەگەنمەن شاقىرۋ كۇشىندە"، — دەدى ول.
ەسكە سالايىق، بۇعان دەيىن ۋكراينا پرەزيدەنتى ۆلاديمير زەلەنسكيي رەسەيمەن كەلىسسوزدەر وتكىزۋ ءۇشىن بەيتاراپ الاڭ رەتىندە بىرنەشە ەلدى اتاعان ەدى. ونىڭ ايتۋىنشا، اۆستريا، شۆەيساريا نەمەسە تۇركيا قولايلى بولۋى مۇمكىن.
زەلەنسكيي ماسكەۋدە كەزدەسۋ وتكىزۋگە ۇزىلدى-كەسىلدى قارسى ەكەنىن اتاپ ءوتتى.
ول تۇركيانى ناتو مۇشەسى جانە ەۋروپانىڭ ءبىر بولىگى رەتىندە قولايلى نۇسقا دەپ باعالادى. ال بۋداپەشتتى كەلىسسوزدەر الاڭى رەتىندە قاراستىرۋعا بولمايتىنىن ايتتى. بۇعان سەبەپ – ۆەنگريانىڭ سوعىس كەزىندە ۋكراينانى قولداماۋى جانە ونىڭ ەۋروپالىق وداققا كىرۋىنە قارسى ۇستانىمى.
وسىلايشا ۋكراينا باسشىسى بەيبىت كەلىسسوزدەر جۇرگىزۋ ءۇشىن بەيتاراپ جانە سەنىمدى ەلدەردى تاڭداۋعا مۇددەلى ەكەنىن كورسەتتى.
