كەنتاۋ ءوندىرىستى قالا ەدى. ەندىگى جەردە اۋىل شارۋاشىلىعى قوسا داميتىن بولادى. تۇركىستان قالاسىنان 12 اۋىلدىق وكرۋگ قوسىلعان تۇستا حالقىنىڭ سانى 200 000-عا جەتىپ، 721 مىڭ گەكتار جەر كولەمى قوسىلدى.
وبلىس اكىمدىگى مەن وبلىستىق اۋىل شارۋاشىلىعى باسقارماسىنىڭ باستاماسىمەن بىرلەسىپ اۋىل شارۋاشىلىعى سالاسى بويىنشا 62 جوبا ازىرلەندى. ونى اۋىل شارۋاشىلىعى مينيسترلىگىنە تاپسىرىپ، قورعالدى. 62 جوبا ىشىنەن دامىتۋعا ساي كەلەتىنى ىرىكتەلىنىپ الىنعان سوڭ، «ق ر اگروونەركاسىپتىك كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى» شەڭبەرىندە قارجىلاي قولداۋ جاسالىپ، سول جوبالارعا قاراجات بەرىلە باستادى. وسىلايشا كەنشىلەر قالاسى ەندىگى جەردە وبلىس ورتالىعى تۇركىستان قالاسىن اۋىل شارۋاشىلىعى ونىمدەرىمەن تولىق قامتاماسىز ەتەتىن اۋىل شارۋاشىلىعى بەلدەۋىن قالىپتاستىرۋعا كۇش سالۋدا.
كەنتاۋعا قوسىلعان اۋىل وكرۋگتەرىندەگى ەڭ نەگىزگى پروبلەمالاردىڭ ءبىرى ەگىستىكتى اعىن سۋمەن قامتاماسىز ەتۋ بولىپ تابىلادى. كوپ اۋىلدا وسى ماسەلە كوتەرىلۋدە.
بۇدان باسقا اۋىلدار اراسىندا ينفراقۇرىلىمدى دامىتۋ، الەۋمەتتىك نىسانداردىڭ جۇمىس ىستەۋى، مەديسينالىق قىزمەت، ترانسپورت جۇيەسى، جولاۋشىلار تاسىمالى جانە باسقا دا ماسەلەلەر مەرزىمىنە سايكەس ءوز شەشىمدەرىن تاباتىن بولدى.
