ۇلىبريتانيا پرەمەر-مينيسترى ديەۆيد كەمەرون مارقۇم اكەسى قۇرعان وفشورلىق كومپانيادا ايەلى ەكەۋىنىڭ ۇلەستەرى بولعانىن مويىندادى. پرەمەردىڭ ايتۋىنشا، ءوز ۇلەستەرىن ايەلى ەكەۋى 2010 جىلى 30 مىڭعا جۋىق فۋنت-ستەرلينگكە (شامامەن 42 مىڭ دوللار) ساتىپ جىبەرگەن.
بۇعان دەيىن كەمەرون ەشقانداي وفشورلىق كومپانياعا قاتىسى جوقتىعىن ايتقانىمەن، بۇرىن-سوڭدى بولعان-بولماعانىن ناقتىلاماعان ەدى. ول جالاقىسى مەن جيناعان اقشاسىنان تۇسەتىن پايىزدىق تابىسقا كۇن كورەتىنىن مالىمدەدى.
پارلامەنتتىك وپپوزيسيا بۇعان دەيىن پرەمەردىڭ تۋىسىنىڭ اتى "پانامالىق قۇجاتتاردا" اتالۋىنا بايلانىستى تاۋەلسىز تەكسەرۋ جۇرگىزۋگە شاقىرعان. بىرىككەن كورولدىكتىڭ سالىقتار مەن كەدەن ماسەلەلەرى بويىنشا قىزمەتى دە قۇجاتتاردى مۇقيات تەكسەرەتىنىن مالىمدەگەن.
جاقىندا جاريا بولعان پانامالىق Mossack Fonseca وفشورلىق كومپانياسىنىڭ قۇجاتتارىندا پرەمەر-مينيستردىڭ اكەسى - يەن كەمەرون 1980 جىلدارى قۇرىلعان وفشورلىق قوردى باسقارعانى، ول قوردىڭ كومەگىمەن اۋقاتتى بريتاندىقتاردىڭ سالىق تولەۋدەن جالتارعانى تۋرالى جازىلعان.
