رەسەيلىك رەپەر OG Buda-نىڭ گاسترولدىك ساپارى قازاقستاندىقتار اراسىندا قىزۋ تالقىعا ءتۇسىپ، ۇلكەن داۋ تۋدىرۋدا. الايدا ءتۇرلى قارسىلىققا قاراماستان، ءانشى كوكتەمدە ەلىمىزگە كەلىپ، جەكە كونسەرتىن وتكىزۋدى جوسپارلاپ وتىر، دەپ حابارلايدى Dalanews.kz.
بۇل جاعداي پروتويەرەي الەكساندر سۋۆوروۆتىڭ ەرەكشە نازارىن اۋداردى. ونىڭ OG Buda-نىڭ قوعامعا قارسى مىنەز-قۇلىقتى ناسيحاتتاۋعا بايلانىستى كونسەرتىن توقتاتۋ تۋرالى ءوتىنىشى الماتى اكىمدىگىنە جولداندى.
ءدىني قىزمەتكەردىڭ پىكىرىنشە، ورىنداۋشىنىڭ ءان ماتىندەرى ءمان-ماعىناسىز. سول سەبەپتى ول مۇنداي تۋىندالار جاستاردىڭ سانا-سەزىمىن ۋلاپ، تەرىس جولعا يتەرمەلەۋى مۇمكىن ەكەنىن ايتىپ دەپ دابىل قاعۋدا.
"ءبىز رەپەردىڭ ءان ماتىندەرىنە تالداۋ جاسادىق. وسى تۇستا ونىڭ شىعارماشىلىعى مادەنيەتسىز نەگىزدە قۇرالعانىنا كوزىمىز جەتتى. قوعامعا قارسى مىنەز-قۇلىقتى ناسيحاتتاۋ بولىگىندە مورال نەگىزدەرىنە جانە قازاقستاندىق زاڭناماعا قايشى كەلەدى دەگەن قورىتىندىعا كەلدىك. ق ر اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ ديسپوزيسياسى قوعامدىق ورىنداردا بالاعات سوزدەر ايتقانى ءۇشىن جاۋاپكەرشىلىكتى كوزدەيدى. سول سەبەپتى بۇدان مورالدىق قانا ەمەس، زاڭدى سيپاتتاعى ماسەلە دە تۋىندايدى. اتاپ ايتاتىن بولسام، مۇنداعى ەسىرتكىنى، الكوگولدى، زورلىق-زومبىلىقتى، ميزوگينيانى، سەكسيزمدى، تۇتىنۋشىلىقتى، بالاعات سوزدەردى ناسيحاتتاۋ قوعامنىڭ رۋحاني جانە مادەني قۇندىلىقتارىنا قايشى كەلەدى. ال بۇل ءانشىنىڭ نەگىزگى اۋديتورياسى – جاسوسپىرىمدەر"، – دەلىنگەن ءدىني قىزمەتكەردىڭ حابارلاماسىندا.
قوعام بەلسەندىلەرى دە مۇنداي ورىنداۋشىلاردىڭ كەشىن وتكىزۋ مەملەكەتتىڭ جاستاردى تاربيەلەۋدەگى كۇش-جىگەرىنە نۇقسان كەلتىرەتىنىن اتاپ ءوتتى. سونىمەن قاتار الەۋمەتتىك جەلىدە اتا-انالار تاراپىنان دا شاعىمدار ايتىلۋدا. ولار "قازاقستانعا كەلمەسىن!"، "بالالارىمىز ءۇشىن الاڭدايمىز!"، "قارسىمىز" دەگەن تىزبەكتەگى پىكىر جازۋدا.
ەندەشە كوپتىڭ تالقىسىنا تۇسكەن بۇل ماسەلە اكىمدىك تاراپىنان ءوز شەشىمىن تابادى دەگەن ۇمىتتەمىز.
ەسكە سالايىق، رەپەر 29 اقپاندا الماتىدا، ال 1 جانە 2 ناۋرىزدا قاراعاندى مەن استانادا كونسەرت وتكىزۋدى جوسپارلاپ وتىر.
