Reseilik reper OG Buda-nyń gastroldik sapary qazaqstandyqtar arasynda qyzý talqyǵa túsip, úlken daý týdyrýda. Alaida túrli qarsylyqqa qaramastan, ánshi kóktemde elimizge kelip, jeke kontsertin ótkizýdi josparlap otyr, dep habarlaidy Dalanews.kz.
Bul jaǵdai protoierei Aleksandr Sývorovtyń erekshe nazaryn aýdardy. Onyń OG Buda-nyń qoǵamǵa qarsy minez-qulyqty nasihattaýǵa bailanysty kontsertin toqtatý týraly ótinishi Almaty ákimdigine joldandy.
Dini qyzmetkerdiń pikirinshe, oryndaýshynyń án mátinderi mán-maǵynasyz. Sol sebepti ol mundai týyndalar jastardyń sana-sezimin ýlap, teris jolǵa itermeleýi múmkin ekenin aityp dep dabyl qaǵýda.
"Biz reperdiń án mátinderine taldaý jasadyq. Osy tusta onyń shyǵarmashylyǵy mádenietsiz negizde quralǵanyna kózimiz jetti. Qoǵamǵa qarsy minez-qulyqty nasihattaý bóliginde moral negizderine jáne qazaqstandyq zańnamaǵa qaishy keledi degen qorytyndyǵa keldik. QR Ákimshilik quqyq buzýshylyq týraly Kodekstiń 434-babynyń dispozitsiiasy qoǵamdyq oryndarda balaǵat sózder aitqany úshin jaýapkershilikti kózdeidi. Sol sebepti budan moraldyq qana emes, zańdy sipattaǵy másele de týyndaidy. Atap aitatyn bolsam, mundaǵy esirtkini, alkogoldi, zorlyq-zombylyqty, mizoginiiany, seksizmdi, tutynýshylyqty, balaǵat sózderdi nasihattaý qoǵamnyń rýhani jáne mádeni qundylyqtaryna qaishy keledi. Al bul ánshiniń negizgi aýditoriiasy – jasóspirimder", – delingen dini qyzmetkerdiń habarlamasynda.
Qoǵam belsendileri de mundai oryndaýshylardyń keshin ótkizý memlekettiń jastardy tárbieleýdegi kúsh-jigerine nuqsan keltiretinin atap ótti. Sonymen qatar áleýmettik jelide ata-analar tarapynan da shaǵymdar aitylýda. Olar "Qazaqstanǵa kelmesin!", "Balalarymyz úshin alańdaimyz!", "Qarsymyz" degen tizbektegi pikir jazýda.
Endeshe kóptiń talqysyna túsken bul másele ákimdik tarapynan óz sheshimin tabady degen úmittemiz.
Eske salaiyq, reper 29 aqpanda Almatyda, al 1 jáne 2 naýryzda Qaraǵandy men Astanada kontsert ótkizýdi josparlap otyr.
