"KEGOC" اق 2024 جىلعى ءبىرىنشى جارتىجىلدىق قىزمەتىنىڭ قورىتىندىلارى بويىنشا ديۆيدەنتتەر تولەدى. كومپانيا بۇل ماقساتقا تازا پايدانىڭ 64،5%-ىن، ياعني 22،7 ملرد تەڭگەنى باعىتتادى. سوندا ءبىر جاي اكسيادان تۇسكەن ديۆيدەنت 82،40 تەڭگەنى قۇرايدى، دەپ حابارلايدى Dalanews.kz.
2024 جىلدىڭ ءبىرىنشى جارتىجىلدىعىنىڭ قورىتىندىسى بويىنشا "KEGOC" اق جاي اكسيالارى بويىنشا ديۆيدەندتەر الۋعا قۇقىعى بار كومپانيا اكسيونەرلەرىنىڭ ءتىزىمى 2024 جىلعى 28 قازاندا 00 ساعات 00 مينۋتقا تىركەلدى.
"KEGOC" اق اكسيونەرلەرىنە جىلىنا ەكى رەت ديۆيدەندتەر تولەيتىنىن ناقتىلاي كەتەلىك.
2023 جىلى كومپانيا ديۆيدەندتىك ساياساتىن جاڭارتتى، وعان سايكەس ديۆيدەندتەردى تولەۋگە تازا پايدانىڭ كەم دەگەندە 60%-ى جۇمسالادى. 2014 جىلدان باستاپ اكسيونەرلەرگە تولەنگەن ديۆيدەندتەر سوماسى 280 ملرد تەڭگەدەن استى.
ايتا كەتسەك، 2023 جىلى كومپانيا KASE مەن AIX بيرجالارىندا ءوز اكسيالارىن قايتا ورنالاستىرۋ (SPO) ارقىلى 22،6 ملرد تەڭگەدەن استام قاراجات تارتىپ، 15 ملن 294 مىڭ 118 باعالى قاعاز ساتتى. ءبىر جاي اكسيانىڭ باعاسى 1 482 تەڭگەنى قۇرادى. SPO ناتيجەسىندە ينۆەستورلارعا ورنالاستىرىلعان جاي اكسيالاردىڭ جالپى كولەمىنىڭ 5%-دان استامى ساتىلدى، وسىلايشا "سامۇرىق-قازىنا" مەملەكەتتىك قورىنىڭ ۇلەسى 90%-دان 85%-عا دەيىن قىسقاردى. كومپانيا IPO-نى 2014 جىلى وتكىزدى، ول كەزدە KASE-دەگى ءبىر جاي اكسيا 505 تەڭگەدە ۇسىنىلدى. KEGOC قازاقستاننىڭ ءبىرىڭعاي ەنەرگەتيكالىق جۇيەسىنىڭ جۇيەلىك وپەراتورى قىزمەتىن اتقارادى.
KASE دەرەكتەرى بويىنشا، 2024 جىلعى 1 قازانداعى جاعداي بويىنشا كومپانيا اكسيالارىنىڭ 85%-ى "سامۇرىق – قازىنا" مەملەكەتتىك قورىنا، 6،88%-ى ءبىرىڭعاي جيناقتاۋشى زەينەتاقى قورىنا تيەسىلى.
