الماتى وبلىسىنىڭ كەگەن اۋدانىندا ورنالاسقان شارىن شاتقالىندا بۇرىن سوڭدى بولماعان، قۇنى 1،5 ملرد. تەڭگە بولاتىن، الەمدىك ستاندارقا ساي «Park Canyon» ويىن ساۋىق پاركىنىڭ قۇرىلىسى وسى جىلى باستالادى.

كەگەن اۋدانىنىڭ اكىمى تالعات بايەديلوۆتىڭ ايتۋىنشا، بۇل جوبا تاۋلى ايماقتىڭ تۋريستىك الەۋەتىن ايتارلىقتاي كوتەرمەك.

– قۇرىلىس جۇمىستارىن جۇرگىزۋگە 24 گا جەر تەلىمى ءبولىنىپ وتىر.  وسى جىلى ءبىرىنشى كەزەكتە 700 ملن. تەڭگەگە قۇرىلىس جۇمىستارى باستالادى. جوبا ىسكە قوسىلعان جاعدايدا، جىلىنا ورتا ەسەپپەن 375 ملن. تەڭگەگە اقىلى تۋريستىك قىزمەت كورسەتەتىن بولادى. 35 ادام تۇراقتى جۇمىسپەن قامتىلىپ، بيۋدجەتكە جىلىنا 47 ملن. تەڭگە قاراجات تۇسىرەدى دەپ جوسپارلاپ وتىرمىز، – دەيدى اۋدان باسشىسى.

سونىمەن قاتار، بۇل نىسان جانىنان ءۇش بىردەي اسپالى كوپىر سالىنادى. شاتقالداعى وتكەلدىڭ ۇزىندىعى 200 مەتر بولسا بيىكتىگى 80 مەترگە جەتەدى. مۇندا، 40 ادامعا ارنالعان قوناق ءۇي تۇرعىزۋ جوسپاردا بار.