ءماجىلىس قازاقستان مەن قىرعىزستان اراسىنداعى شەكارالىق وتكىزۋ پۋنكتتەرى تۋرالى كەلىسىمگە ەنگىزىلگەن وزگەرىستەردى راتيفيكاسيالادى، دەپ حابارلايدى Dala News.
قۇجاتقا سايكەس، «كەگەن-اۆتوجولدىق» (قازاقستان) – «قارقارا-اۆتوجولدىق» (قىرعىزستان) وتكىزۋ بەكەتىنىڭ جۇمىس ۋاقىتى ەندى «كۇندىزگى رەجيمنەن» «تاۋلىك بويىنا» اۋىستىرىلادى. بۇعان دەيىن بەكەت تەك جارىق ۋاقىتتا عانا قىزمەت كورسەتىپ كەلگەن.
بۇل شەشىم ەكى ەل اراسىنداعى شەكارالىق ىنتىماقتاستىقتى نىعايتۋعا، تاۋار اينالىمىن ارتتىرۋعا جانە ءتۋريزمدى دامىتۋعا مۇمكىندىك بەرەدى. اسىرەسە قارقارا جايلاعى باعىتى بويىنشا جۇرەتىن تۋريستەر مەن كاسىپكەرلەر ءۇشىن قوزعالىس الدەقايدا ىڭعايلى بولماق.
ايتا كەتەيىك، قىرعىزستانمەن شەكارادا جالپى 12 وتكىزۋ بەكەتى بار. ونىڭ سەگىزى كوپجاقتى، تورتەۋى ەكىجاقتى رەجيمدە جۇمىس ىستەيدى. قازاقستان مەن قىرعىزستان اراسىنداعى شەكارا حالىقارالىق قۇقىق نورمالارىنا تولىق ساي راسىمدەلگەن.
