2024 جىلدىڭ 28 قىركۇيەگىندە قازاقستان-بريتان تەحنيكالىق ۋنيۆەرسيتەتىندە (قبتۋ) رەسپۋبليكا كۇنى اياسىندا “KBTU Unlocked 2024” ينتەراكتيۆتى ويىنى ءوتتى. بۇل شارا ۋنيۆەرسيتەتكە كەلگەن قوناقتارعا قبتۋ-دىڭ باي تاريحىمەن جانە زاماناۋي تەحنولوگيالارىمەن تانىسۋعا مۇمكىندىك بەردى، دەپ حابارلايدى Dalanews.kz.
كۆەستكە قاتىسۋشىلار كوماندالارعا ءبولىنىپ، ۋنيۆەرسيتەتتىڭ قىزىقتى ايماقتارىن زەرتتەدى. اتاپ ايتاتىن بولساق، Gamelab زەرتحاناسىن، قازاقستان تەڭىز اكادەمياسىنىڭ سيمۋلياتورلارىن، اكادەميك د.ا.قونايەۆ كابينەتىن، سونداي-اق روبوتوتەحنيكا جانە نانوتەحنولوگيا زەرتحانالارىن تاماشالادى. ويىن بارىسىندا كوماندالار جۇمباقتاردى شەشىپ، تاپسىرمالاردى ورىنداۋ ارقىلى ءار كەزەڭگە ءوتىپ وتىردى.
ويىننىڭ باستى ماقساتى – سوڭعى جۇمباقتى شەشىپ، 2001 جىلى قاسىم-جومارت توقايەۆ قبتۋ قۇرۋ تۋرالى قول قويعان ۇكىمەت قاۋلىسىنىڭ كوشىرمەسىن تابۋعا نەگىزدەلدى.
كۆەست ەرەكشە اۋرادا ءوتتى. ماسەلەن، ۆيزۋالدى جانە جارىق ەففەكتىلەرى ويىننىڭ قىزىق وتۋىنە سەبەپ بولدى. ەڭ ماڭىزدىسى، اتالمىش كۆەست بىرلەسكەن جۇمىسقا باعىتتالدى، ياعني كوماندالار ورتاق ماقساتقا جەتۋى ءۇشىن بىرىگىپ ارەكەت ەتتى.
قبتۋ-دىڭ زاماناۋي تەحنولوگيالارىن كورسەتۋگە ارنالعان “KBTU Unlocked 2024” ويىنى ۋنيۆەرسيتەتتىڭ عىلىمي جانە زەرتتەۋ جەتىستىكتەرىن ايقىن كورسەتتى.
وسى تۇستا قبتۋ-دا GameLab زەرتحاناسىنىڭ جەتەكشىسى الەكساندرا كنىشيەۆا وقۋ ورداسىندا ۇيىمداستىرىلعان شاراعا قاتىستى ءوز ويىن ءبولىستى.
"ءبىز الماتىنىڭ بىرەگەي عيماراتتارىنىڭ ءبىرى – قبتۋ-دى كورسەتكىمىز كەلدى. بۇل ورىن كوپشىلىككە ءمالىم ءارى ونى قالانىڭ كورىكتى نىساندارىنىڭ ءبىرى رەتىندە باعالايدى. وكىنىشكە قاراي، ونىڭ ىشكى الەمىمەن تانىسقان جاندار بىرەڭ-ساراڭ. ءبىز وسى عيماراتتىڭ قازىرگى تىنىسىن، ونىڭ ىشكى ءومىرىن كورسەتكىمىز كەلدى. ونىڭ ەرەكشە تاريحى بار، ال ءبىز وسى تاريح پەن بولاشاق اراسىنداعى بايلانىستى ەرەكشە فورماتتا ۇيىمداستىرۋدى كوزدەدىك. بۇل يدەيانىڭ نەگىزىندە ستۋدەنتتەرىمىز وتكەن قۇندىلىقتاردى بويىنا ءسىڭىرىپ، ونى بولاشاققا جەتكىزەدى”، - دەدى كنىشيەۆا.
سونىمەن قاتار ول ويىننىڭ ەرەكشەلىكتەرىنە دە توقتالىپ ءوتتى.
“ءبىزدىڭ كۆەستتىڭ اڭىزىنا سايكەس، تانىمال بلوگەر الينا كيم قبتۋ عيماراتىنا ونىڭ قۇپيالارى مەن جۇمباقتارىن زەرتتەۋ ءۇشىن كىرىپ، كەزدەيسوق ءبىر اۋديتوريادا قۇلىپتالىپ قالادى. كۆەستكە قاتىسۋشىلار ونىڭ قاي اۋديتوريادا ەكەنىن انىقتاپ، ونى شىعارۋ جولىن تابۋى كەرەك بولدى. ولارعا جول كورسەتۋشى رەتىندە قبتۋ-دىڭ ماسكوتى، جاساندى ينتەللەكت ارقىلى “جان بىتكەن” بريتاندىق مىسىق كومەككە كەلدى”، - دەپ قوستى ول.
ايتۋىنشا، جوبانى ۋنيۆەرسيتەتتىڭ ستۋدەنتتەرى مەن قىزمەتكەرلەرى ازىرلەگەن.
“ماسكوت ءبىزدىڭ ويىنىمىزدىڭ باستى ەلەمەنتىنە اينالدى. سونىمەن قاتار قاتىسۋشىلارعا قبتۋ ستۋدەنتتەرى جاردەم بەردى. ولار عيماراتتىڭ ءار بۇرىشىن جاقسى بىلەدى. وسىلايشا قاتىسۋشىلارعا ءار اۋديتوريادا بۇرىن نە بولعانىن، قازىرگى ۋاقىتتا قانداي جوبالار جۇرگىزىلىپ جاتقانىن ءتۇسىندىردى. مىسالى، روبوتوتەحنيكا زەرتحاناسىندا قاتىسۋشىلار دروندار جاساپ، جاساندى ينتەللەكتپەن جۇمىس ىستەيتىن ستۋدەنتتەردىڭ جۇمىسىمەن تانىستى.
ولار، ءتىپتى، ءبىزدىڭ ماسكوت مىسىقپەن دوس بولاتىن روبو-يتپەن دە كەزدەستى. ال Game Lab زەرتحاناسىندا بولاشاققا ارنالعان ۆيدەو ويىنداردى كوردى. قازىرگى تاڭدا بىزدە قازاقستاننىڭ مادەني جانە تاريحي كونتەكستىن اشاتىن ءبىلىم بەرۋ ويىندارىن جاساۋ جۇمىستارى بەلسەندى تۇردە جۇرگىزىلىپ جاتىر”، - دەيدى كنىشيەۆا.
ونىڭ سوزىنشە، قاتىسۋشىلار ەل تاريحىنداعى ايتۋلى تۇلعا دىنمۇحامەد قونايەۆتىڭ دا جەكە كابينەتىمەن تانىسقان.
“ارينە، قاتىسۋشىلار قونايەۆ اۋديتورياسىنا دا باردى. بۇل اۋديتوريادا ءقازىر ستۋدەنتتەر وقىسا دا، ينتەرەر سول بۇرىنعى قالپىندا ساقتالعان. قونايەۆتىڭ جۇمىس ۇستەلى مەن پايدالانعان كارتاسى عانا قالپىنا كەلتىرىلگەن. وسىنداي ەرەكشە ورتادا ءبىزدىڭ ستۋدەنتتەر ەلدىڭ تاريحىن تەرەڭىرەك ءتۇسىنىپ، ونى بولاشاققا جەتكىزۋ ءۇشىن ءبىلىم الۋدا،" – دەپ ءبولىستى الەكساندرا كنىشيەۆا.
ويىندا توبە كورسەتكەن قاتىسۋشىلاردىڭ دا العان اسەرى ەرەكشە بولدى.
“ماعان ويىن قاتتى ۇنادى. اسىرەسە، لوگيكالىق سۇراقتار ميىمىزعا جاڭا سەرپىلىس بەردى. سونداي-اق جاڭا ورتامەن تانىسۋعا مۇمكىندىك تۋدى. ءبارىمىز ورتاق ماقساتقا جەتۋ ءۇشىن بىرلەسىپ تاپسىرمالاردى ورىندادىق”، - دەيدى قاتىسۋشى ايىم ءماجيت.
ايتا كەتەيىك، كۆەست ۇيىمداستىرۋشىلارى قبتۋ بويىنشا تاۋەلسىزدىك كۇنى، ناۋرىز جانە مەملەكەتتىك رامىزدەر كۇنى سياقتى مەرەكەلەر قارساڭىندا ءبىرقاتار ەكسكۋرسيا وتەتىنىن جاريالادى. ەندى بارلىق نيەت بىلدىرۋشىلەر كامپۋستىڭ قىزىقتى جەرلەرىن زەرتتەۋگە جانە ونىڭ تاريحىمەن، يننوۆاسيالارىمەن تانىسۋعا مۇمكىندىك الادى.
