كاسپيي تەڭىزىندە اۋماعى 80 شارشى شاقىرىمنان اساتىن ءىرى داق تىركەلدى. بۇل كولەم شامامەن اقتاۋ قالاسىنىڭ اۋماعىنا تەڭ، دەپ حابارلايدى Dalanews.kz.
العاشقى حابارلامالار «كاسپييدەگى اشىق الەم» تەلەگرام-ارناسىندا جاريالاندى.
«Sentinel-1ا سپۋتنيگىنىڭ راديولوكاسيالىق سۋرەتتەرىندە مىناداي داقتار بايقالدى: بولشەكتەنگەن كەمە قالدىقتارى. اۋماعى 82،51 شارشى شاقىرىم. قازاقستان جانە ازەربايجان سەكتورلارىندا، قۇرىق – باكۋ تەڭىز جولى بويىندا»، - دەپ جازدى ارنا.
ماڭعىستاۋ وبلىسى ەكولوگيا دەپارتامەنتىنىڭ مالىمەتىنشە، لاستانۋ ورنى قازاقستان يۋريسديكسياسىنان تىس جەردە ورنالاسقان. ماماندار مۇناي توگىندىسىن جوققا شىعارىپ وتىر. بۇل ماي قالدىقتارى نەمەسە بالىق اۋلاۋ كەزىندە تاستالعان قالدىقتار بولۋى مۇمكىن.
«كوورديناتتار بويىنشا، اتالعان جەر قازاقستاننىڭ ەڭ جاقىن جاعالاۋىنان شامامەن 61 تەڭىز ءميلى (113 كم) قاشىقتىقتا. بۇل ايماق حالىقارالىق تەڭىز جولدارىنا جاتادى جانە كورشىلەس ەلدەردىڭ اكۆاتورياسىن قامتۋى مۇمكىن»، - دەپ ناقتىلادى دەپارتامەنت.
جاعدايعا تجد دە تۇسىنىكتەمە بەردى. ۆەدومستۆو مالىمەتىنشە، مۇنداي قۇبىلىستار سپۋتنيكتىك سۋرەتتەردە تۇراقتى تىركەلىپ وتىرادى. جىل باسىنان بەرى تەڭىزدىڭ سولتۇستىك بولىگىندە شامامەن 50 داق بايقالعان.
«كوپ جاعدايدا بۇل داقتار ۇزىنشاق پىشىندە بولادى، ولار كەمە قوزعالىسى كەزىندە توگىلگەن قالدىق سۋلارعا ءتان. مۇنداي داقتاردىڭ حيميالىق قۇرامى انىقتالمايدى، مۇناي توگىندىسى بار دەگەن دالەلدەنگەن دەرەكتەر جوق. بارلىق باقىلاۋ تەك سپۋتنيكتىك مالىمەتتەردىڭ ۆيزۋالدى تالداۋىنا نەگىزدەلەدى»، - دەدى ماڭعىستاۋ وبلىسى تجد.
ەكولوگتاردىڭ ايتۋىنشا، كەمەلەر كوبىنە جاۋاپكەرشىلىكتەن قۇتىلۋ ءۇشىن كاسپييدىڭ بەيتاراپ سۋ ايماقتارىنا ءوز قالدىقتارىن نەمەسە لاس سۇيىقتىقتارىن تاستايدى.
ماسەلەنى تەرەڭىرەك زەرتتەۋ ءۇشىن «قازاقستان عارىش ساپارى» اق تارتىلدى. كومپانيا حالىقارالىق عارىش ۇيىمدارىمەن بىرلەسىپ، تەڭىز اكۆاتورياسىنا جەدەل ءتۇسىرىلىم جۇرگىزىپ جاتىر.
