ماڭعىستاۋ وبلىسىنىڭ ءتۇپقاراعان اۋدانىندا كاسپيي تەڭىزىنىڭ جاعالاۋىنان قىزىل كىتاپقا ەنگەن 88 يتبالىقتىڭ ولەكسەسى تابىلدى. بۇل تۋرالى جايىق–كاسپيي وبلىسارالىق باسسەيندىك بالىق شارۋاشىلىعى ينسپەكسياسى مالىمدەدى،- دەپ حابارلايدى Dalanews.kz
تابىلعان اۋماققا ينسپەكسيا وكىلدەرىمەن بىرگە جەرگىلىكتى اكىمدىك پەن گيدروبيولوگيا جانە ەكولوگيا ينستيتۋتىنىڭ ماماندارى بارىپ، جاعدايدى تەكسەردى. ءولى جانۋارلار بويىنشا ءتۇپقاراعان اۋدانىنىڭ پوليسيا بولىمىندە ق ر قك 339-بابى (سيرەك كەزدەسەتىن جانە جويىلىپ كەتۋ ءقاۋپى تونگەن جانۋارلاردى زاڭسىز جويۋ) بويىنشا سوتقا دەيىنگى تەرگەپ-تەكسەرۋ باستالدى.
قازگيدرومەت ماماندارىنىڭ ايتۋىنشا، وقيعا ورىن العان كەزەڭدە تەڭىزدە باتىس باعىتتاعى جەلدەر ۇستەم بولعان، بۇل ولەكسەلەردى جاعاعا الىپ كەلۋى مۇمكىن. ال گيدروبيولوگيا جانە ەكولوگيا ينستيتۋتىنىڭ دەرەگىنشە، تابىلعان يتبالىقتاردىڭ دەنەسى قاتتى ءشىرىپ كەتكەندىكتەن، ولاردان زەرتحانالىق تالداۋ ءۇشىن ساپالى سىناما الۋ مۇمكىن بولماعان.
قازىرگى ۋاقىتتا يتبالىقتاردىڭ ناقتى نەدەن قىرىلعانى بەلگىسىز.
كاسپيي تەڭىزىنىڭ جاعالاۋ بەلدەۋىندە مونيتورينگ جۇمىستارى جالعاسىپ جاتىر. يتبالىقتاردىڭ جاپپاي قىرىلۋى بويىنشا جاعداي اۋىل شارۋاشىلىعى مينيسترلىگىنە قاراستى بالىق شارۋاشىلىعى كوميتەتىنىڭ باقىلاۋىندا.
