دەنساۋلىق ساقتاۋ مينيسترلىگى شەكتەۋ شارالارى ەل بويىنشا COVID-19 ينفەكسياسىن 10 ەسەگە، جەدەل جاردەمدى شاقىرۋ سانىن 4،2 ەسەگە، اۋرۋحانادا جاتقانداردىڭ سانىن 80%-عا تومەندەتۋگە مۇمكىندىك بەرگەنىن، ال ءموبيلدى بريگادالار سانى 7،6 ەسەگە ارتقانىن حابارلادى.
قول جەتكىزىلگەن وڭ اسەردى ەسكەرە وتىرىپ، ۆەدومستۆوارالىق كوميسسيا بيىل 31 تامىزدان باستاپ كەلەسى نىسانداردىڭ قىزمەتىن قايتا باستاۋ تۋرالى شەشىم قابىلدادى:
- ءدىني وبەكتىلەر (جەكە، ۇجىمدىق ءىس-شارالار وتكىزىلمەيدى)؛
- باسسەيندەر (جەكە فورماتتا، 1 كەلۋشىگە 5 ش. م. سۋ ايناسى ەسەبىنەن، الدىن الا جازىلۋ ارقىلى)؛
- جاتتىعۋ زالدارى (1 كەلۋشىگە 5 ش. م. دەيىن، الدىن الا جازىلۋ ارقىلى)؛
- سپورت كەشەندەرى (1 كەلۋشىگە 5 ش. م. دەيىن جەكە جانە توپتىق جاتتىعۋلار ءۇشىن)؛
- مادەنيەت نىساندارى (1 كەلۋشىگە 5 شارشى مەترگە دەيىن، تولىمدىلىعى 50%-دان اسپايدى، ونىڭ ىشىندە كەمىندە 2 مەتر الەۋمەتتىك قاشىقتىقتى ساقتاي وتىرىپ، 30 ادامعا دەيىن ۇجىمدىق دايىندىقتار، ۇزىلىستەردە بولمەلەردى جەلدەتۋ، بەتپەردە تاعۋ)؛
- ەرەكشە قورعالاتىن تابيعي اۋماقتار: مەملەكەتتىك ۇلتتىق تابيعي پاركتەر، قورىقتار، رەزەرۆاتتار جانە ت. ب. (جەكە جانە ۇيىمداسقان توپتار ءۇشىن 15 ادامنان اسپايتىن، الەۋمەتتىك اراقاشىقتىقتى ساقتاي وتىرىپ، كەمىندە 2 مەتر، بەتپەردە تاعۋ)؛
- قالا ماڭىنداعى جولاۋشىلار پويىزدارىنىڭ/ەلەكتر پويىزدارىنىڭ، قالاارالىق، وبلىسىشىلىك اۆتوبۋستاردىڭ/شاعىن اۆتوبۋستاردىڭ قوزعالىسىنا رۇقسات بەرىلەدى.
"بارلىق نىساندار ءتيىستى دايىندىق اكتىلەرىن العاننان كەيىن عانا جۇمىسقا كىرىسۋگە رۇقسات بەرىلەدى. وڭىرلەردىڭ اكىمدىكتەرى دەنساۋلىق ساقتاۋ مينيسترلىگى، "اتامەكەن" ۇكپ-مەن بىرلەسىپ، قوعام بەلسەندىلەرىن تارتا وتىرىپ، ەنگىزىلەتىن نىسانداردىڭ بارلىق سانيتارلىق تالاپتاردى قاتاڭ ساقتاۋىن قامتاماسىز ەتۋى قاجەت"، — دەپ اتاپ ءوتتى توعجانوۆ.
كەڭەس قورىتىندىسى بويىنشا پرەمەر-مينيستردىڭ ورىنباسارى ءبىرقاتار ناقتى تاپسىرمالار بەردى.
