بۇگىن كارانتين كەزىندە جۇمىستارىنىڭ قارقىنىن تومەندەتپەي، ەل ەكونوميكاسىنا ۇلەس قوسقان SPD EXPRESS كومپانياسىنىڭ جۇمىسى جايىندا از-كەم اڭگىمەلەۋدى ءجون ساناپ وتىرمىز.
ناۋرىزدىڭ اياعىنان باستاپ، مامىر ايىنىڭ باسىنا دەيىن سوزىلعان توتەنشە جاعداي مەن كارانتيندىك شارالار بيزنەسكە وڭاي سوقپاعانى انىق. ءوز كەزەگىندە ءتۇرلى زاتتاردى ەلىمىز بويىنشا جەدەل جەتكىزۋ ىسىمەن اينالىساتىن SPD EXPRESS كومپانياسىنىڭ جەتەكشسى راۋشان كاشكومبايەۆا كارانتيندىك شارالار وزدەرىنە وڭاي تيمەگەنىن جاسىرماي ايتتى.
– شىنى كەرەك، بيىلعى جۇمىس جوسپارىمىزدا مۇنداي قيىن جاعدايعا تاپ بولامىز دەپ ويلامادىق. ءبىراق قانداي جاعداي بولسا دا جۇمىس ىستەپ، نارىقتاعى ورنىن ساقتاپ قالۋ كەز كەلگەن كومپانيانىڭ العا قويعان باستى ماقساتى دەپ ەسەپتەيمىن. سوندىقتان بىزدەر ەلىمىزدە ىندەتتىڭ تارالۋىنا توسقاۋىل قويۋ ماقساتىندا توتەنشە جاعداي جاريالانىپ، قاتاڭ كارانتيندىك شارالار ەنگىزىلگەن ساتتەن باستاپ، ءوزىمىزدىڭ جۇمىس ءتاسىلىمىزدى پىسىقتاپ، ستراتەگيامىزدى قايتا تەكسەرىپ شىقتىق. ءبىرىنشى كەزەكتە كومپانيامىزدىڭ شىعىندارىن قايتا قاراۋعا تۋرا كەلدى. كەز كەلگەن داعدارىستا بيزنەستىڭ كەيبىر تۇرلەرى ءۇشىن جاڭا مۇمكىندىكتەر پايدا بولۋى مۇمكىن. كارانتين كەزىندە جۇرتتىڭ بىر-بىرىمەن بايلانىسى كۇرت تومەندەپ، ءتۇرلى زاتتاردى دەر كەزىندە جەتكىزۋ ىسىمەن اينالىساتىن ءبىز سياقتى جاڭا كومپانيالارعا ۇلكەن جاۋاپكەرشىلىك جۇگى ارتىلدى دەسەك بولادى. ىندەت كەزىندە حالىقتىڭ سەنىمىنەن شىعۋ ءۇشىن بىزدەر ءوز قىزمەتكەرلەرىمىزدىڭ دەنساۋلىعىن باقىلاۋعا الىپ، ولاردىڭ جەدەل كىدىرىسسىز جۇمىس ىستەۋىنە كۇش سالدىق. وسىنداي قيىن كەزەڭدە قىزمەتكەرلەردىڭ ايلىعىن كەشىكتىرمەي تولەۋ، ىندەت جۇقتىرماي جۇمىس ىستەۋى ءۇشىن ولاردىڭ ءبارىن قاجەتتى مەديسينالىق قورعانىس قۇرالدارىمەن قامتاماسىز ەتتىك، – دەيدى راۋشان كاشكومبايەۆا.
توتەنشە جاعداي كەزىندە تەمىرجول مەن اۋە قاتىناسى جۇمىسىن توقتاتقانى بەلگىلى. بۇل ەلىمىز بويىنشا جۇك تاسىمالىمەن اينالىساتىن كومپانيالارعا اۋىر سوققى بولىپ تيگەنى جاسىرىن ەمەس. SPD EXPRESS كومپانياسى دا بۇل قيىندىقپەن بەتپە-بەت كەلگەن. ولار ءبىرىنشى كەزەكتە الماتى قالاسى اۋماعىندا جۇرتقا ساپالى قىزمەت كورسەتۋ ءۇشىن الماتى قالاسى اكىمدىگى جانىنداعى ارنايى شتابپەن حابارلاسىپ، قالا ىشىندەگى جەتكىزۋ قىزمەتىن توقتاتپاۋ ءۇشىن قاجەتتى رۇقساتتاردى دەر كەزىندە الىپ، الماتىلىقتارعا ساپالى قىزمەت كورسەتكەنىن ايتا كەتۋىمىز كەرەك.
SPD EXPRESS وكىلى كارانتين كەزىندە حالىقتىڭ كوپشىلىگى ينتەرنەت دۇكەندەردىڭ قىزمەتىنە جۇگىنگەنىن العا تارتتى. ولار ينتەرنەت دۇكەندەرمەن كەلىسىمگە كەلىپ، قالا ىشىندە جۇرتتىڭ تاپسىرىس بەرگەن تاۋارلارىن ءدال ۋاقىتىندا جەتكىزىپ بەرگەن.
وسى رەتتە ايتا كەتۋىمىز كەرەك، توتەنشە جاعداي مەن كارانتين كەزىندە SPD EXPRESS كومپانياسىنىڭ كەڭسە قىزمەتكەرلەرى قاشىقتان جۇمىس ىستەۋگە كوشكەن. وسىلايشا، ولار رەسپۋبليكالىق دەڭگەيدە قابىلدانعان شارالارعا ايرىقشا نازار اۋدارىپ، ءوز قىزمەتكەرلەرىنىڭ ىندەتكە شالدىقپاۋىنا باسا ءمان بەرگەن.
كارانتين كەزىندە SPD EXPRESS كومپانياسىنىڭ قىزمەتىن تۇتىناتىن وزگە كومپانيالارعا دا وڭاي تيمەپتى. كارانتينگە دەيىن تاۋارلارىن ەلىمىزدىڭ وزگە ايماقتارىنا، ءتىپتى كورشىلەس ەلدەرگە ەركىن تاسىمالداپ جۇرگەن كومپانيالار ەكى اي بويى ءتيىستى جۇكتەرىن اۋە تاسىمالىنىڭ توقتاۋىنا بايلانىستى دەر كەزىندە جەتكىزە الماعان جاعدايلار بولىپتى.
اۋە قاتىناسى توقتاعاننان كەيىن كومپانيا اۆتوكولىكتەردىڭ قىزمەتىنە جۇگىنۋگە ءماجبۇر بولعان. ناتيجەسىندە، جۇكتىڭ جول بويىندا ۇزاق ءجۇرىپ قالعانى جاسىرىن ەمەس. وبلىس پەن قالالارداعى بلوك-بەكەتتەردەگى تەكسەرىستەر، ءار قالادا قابىلدانعان كارانتيندىك شارالاردىڭ ءارتۇرلى بولۋى دا جۇكتىڭ دىتتەگەن جەرىنە تەز جەتۋىنە كەدەرگى كەلتىرىپتى.
ءبىراق SPD EXPRESS كومپانياسىنىڭ قىزمەتكەرلەرى مۇنداي ۋاقىتشا قيىندىقتارعا مويىماي، ءوز جۇمىستارىن ءمىنسىز اتقارىپ شىققان.
ايتالىق، كارانتين كەزىندە كوروناۆيرۋستى اۋىزدىقتاۋعا قاجەتتى مەديسينالىق جابدىقتار مەن مەديسينالىق ماسكا سەكىلدى ءبىرىنشى كەزەكتى قاجەت قورعانىس قۇرالدارىن ءبىر قالادان ەكىنشى ءبىر قالاعا ءدال ۋاقىتىندا جەتكىزىپ، ەلىمىزدە ىندەتتىڭ تارالماۋىنا ءوز ۇلەستەرىن قوسىپ وتىردى.
وسىلايشا، SPD EXPRESS سىندى نارىقتا ابدەن تانىلعان كومپانيالاردىڭ ارقاسىندا ورتالىقتان شالعايدا جاتقان اۋدان مەن قالالارعا قاجەتتى مەديسينالىق جابدىقتار ءدال ۋاقىتىندا جەتىپ وتىرعان. بۇل ءۇشىن لوگيستيكالىق كومپانياعا العىستان باسقا ايتارىمىز جوق.
نۇرلان جۇماحان
