قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتوراعاسى ايدا بالايەۆا اتا-انالارعا ۇندەۋ جاسادى،- دەپ حابارلايدى Dalanews.kz.
قۇرمەتتى اتا-انالار!
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا كامەلەتكە تولماعان بالالاردىڭ كەشكى جانە تۇنگى ۋاقىتتا ەرەسەكتەردىڭ قاراۋىنسىز قوعامدىق ورىنداردا ءجۇرۋ فاكتىلەرىنىڭ جيىلەپ كەتۋىنە الاڭداۋشىلىق بىلدىرەدى.
ىشكى ىستەر مينيسترلىگىنىڭ رەسمي مالىمەتتەرى بويىنشا، اعىمداعى جىلدىڭ
27-29 شىلدە كۇندەرى ارالىعىندا وتكەن «تۇنگى قالاداعى بالالار» پروفيلاكتيكالىق رەيدى شەڭبەرىندە 8 مىڭعا جۋىق اكىمشىلىك قۇقىق بۇزۋشىلىق انىقتالدى. اتاپ ايتقاندا:
- 705 اتا-انا بالا تاربيەسىنە قاتىستى اتا-انالىق مىندەتتەرىن ورىنداماعانى ءۇشىن جاۋاپكەرشىلىككە تارتىلدى؛
- 176 ۇساق بۇزاقىلىق تىركەلدى؛
- تۇنگى ۋاقىتتا كامەلەتكە تولماعانداردىڭ ويىن-ساۋىق ورىندارىندا جانە كوشەدە بولۋىنا جول بەرگەنى ءۇشىن 6،8 مىڭ اتا-انا مەن 170 كاسىپكەرگە شارا قولدانىلدى.
بۇل فاكتىلەر بالالارعا قاتىستى قۇقىق بۇزۋشىلىقتارعا الىپ كەلۋى مۇمكىن ەدى. وسىعان بايلانىستى پوليسيا ورگاندارى تاراپىنان ولاردىڭ الدىن الۋعا باعىتتالعان شارالار قابىلداندى.
اتا-انالار مەن كامەلەتكە تولماعانداردىڭ زاڭدى وكىلدەرىنە ۇندەۋ تاستايمىز: بالالاردىڭ قاۋىپسىزدىگىنە تونەتىن قاۋىپ-قاتەرلەردىڭ ارتۋىنا بايلانىستى، ولاردىڭ قايدا جۇرگەنىن باقىلاۋعا الىپ، جەكە قاداعالاۋدى كۇشەيتۋلەرىڭىزدى سۇرايمىز.
قازاقستان رەسپۋبليكاسىنىڭ زاڭناماسىنا سايكەس، كامەلەتكە تولماعانداردىڭ ساعات 22:00-دەن كەيىن اتا-اناسىنىڭ نەمەسە زاڭدى وكىلىنىڭ ىلەسۋىنسىز كوشەدە جۇرۋىنە تىيىم سالىنادى. بۇل تالاپتىڭ بۇزىلۋى اكىمشىلىك جاۋاپكەرشىلىككە اكەپ سوعادى جانە كەيبىر جاعدايلاردا ورنى تولماس قايعىلى زارداپتارعا اكەلۋى مۇمكىن – بالانىڭ دا، وتباسىنىڭ دا تاعدىرىنا اسەر ەتۋى ىقتيمال.
كەشكى جانە تۇنگى ۋاقىتتا كوشەدە جۇرگەن بالالار، اسىرەسە تەرىس پيعىلدى ورتانىڭ ىقپالىنا تۇسسە، مىناداي قاتەرلەرگە تاپ بولۋى مۇمكىن: قۇقىق بۇزۋشىلىق، بەيالەۋمەتتىك توپتارعا تارتىلۋ، قايعىلى وقيعالار جانە زورلىق-زومبىلىق.
سىزدەردەن ءوتىنىش:
- بالاڭىزدىڭ قايدا جانە كىممەن جۇرگەنىن كۇندەلىكتى ءبىلىپ وتىرىڭىزدار؛
- ونىڭ تۇنگى ۋاقىتتا قاراۋسىز كوشەدە جۇرۋىنە جول بەرمەڭىزدەر؛
- بالاڭىزبەن جەكە قاۋىپسىزدىك، جاۋاپكەرشىلىك جانە زاڭعا قۇرمەت تۋرالى ءجيى سويلەسىپ وتىرىڭىزدار.
وتباسى – تاربيەنىڭ العاشقى جانە ەڭ ماڭىزدى وشاعى. بالالاردىڭ بويىندا تارتىپتىلىك، الەۋمەتتىك جاۋاپكەرشىلىك پەن قۇقىقتىق سانا تەك اتا-انالاردىڭ بەلسەندى قاتىسۋىمەن قالىپتاسادى.
بالالاردىڭ قاۋىپسىزدىگىنە دەگەن جاۋاپكەرشىلىك – الدىمەن ەرەسەكتەردىڭ مىندەتى.
قوعام، مەملەكەت جانە وتباسى بىرلەسە ارەكەت ەتكەندە عانا ءبىز قازاقستان بالالارىنا ءقاۋىپسىز ءارى جارقىن بولاشاق قامتاماسىز ەتە الامىز.
