Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń Tóraǵasy Aida Balaeva ata-analarǵa úndeý jasady,- dep habarlaidy Dalanews.kz.
Qurmetti ata-analar!
Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiia kámeletke tolmaǵan balalardyń keshki jáne túngi ýaqytta eresekterdiń qaraýynsyz qoǵamdyq oryndarda júrý faktileriniń jiilep ketýine alańdaýshylyq bildiredi.
Ishki ister ministrliginiń resmi málimetteri boiynsha, aǵymdaǵy jyldyń
27-29 shilde kúnderi aralyǵynda ótken «Túngi qaladaǵy balalar» profilaktikalyq reidi sheńberinde 8 myńǵa jýyq ákimshilik quqyq buzýshylyq anyqtaldy. Atap aitqanda:
- 705 ata-ana bala tárbiesine qatysty ata-analyq mindetterin oryndamaǵany úshin jaýapkershilikke tartyldy;
- 176 usaq buzaqylyq tirkeldi;
- túngi ýaqytta kámeletke tolmaǵandardyń oiyn-saýyq oryndarynda jáne kóshede bolýyna jol bergeni úshin 6,8 myń ata-ana men 170 kásipkerge shara qoldanyldy.
Bul faktiler balalarǵa qatysty quqyq buzýshylyqtarǵa alyp kelýi múmkin edi. Osyǵan bailanysty politsiia organdary tarapynan olardyń aldyn alýǵa baǵyttalǵan sharalar qabyldandy.
Ata-analar men kámeletke tolmaǵandardyń zańdy ókilderine úndeý tastaimyz: balalardyń qaýipsizdigine tónetin qaýip-qaterlerdiń artýyna bailanysty, olardyń qaida júrgenin baqylaýǵa alyp, jeke qadaǵalaýdy kúsheitýlerińizdi suraimyz.
Qazaqstan Respýblikasynyń zańnamasyna sáikes, kámeletke tolmaǵandardyń saǵat 22:00-den keiin ata-anasynyń nemese zańdy ókiliniń ilesýinsiz kóshede júrýine tyiym salynady. Bul talaptyń buzylýy ákimshilik jaýapkershilikke ákep soǵady jáne keibir jaǵdailarda orny tolmas qaiǵyly zardaptarǵa ákelýi múmkin – balanyń da, otbasynyń da taǵdyryna áser etýi yqtimal.
Keshki jáne túngi ýaqytta kóshede júrgen balalar, ásirese teris piǵyldy ortanyń yqpalyna tússe, mynadai qaterlerge tap bolýy múmkin: quqyq buzýshylyq, beiáleýmettik toptarǵa tartylý, qaiǵyly oqiǵalar jáne zorlyq-zombylyq.
Sizderden ótinish:
- balańyzdyń qaida jáne kimmen júrgenin kúndelikti bilip otyryńyzdar;
- onyń túngi ýaqytta qaraýsyz kóshede júrýine jol bermeńizder;
- balańyzben jeke qaýipsizdik, jaýapkershilik jáne zańǵa qurmet týraly jii sóilesip otyryńyzdar.
Otbasy – tárbieniń alǵashqy jáne eń mańyzdy oshaǵy. Balalardyń boiynda tártiptilik, áleýmettik jaýapkershilik pen quqyqtyq sana tek ata-analardyń belsendi qatysýymen qalyptasady.
Balalardyń qaýipsizdigine degen jaýapkershilik – aldymen eresekterdiń mindeti.
Qoǵam, memleket jáne otbasy birlese áreket etkende ǵana biz Qazaqstan balalaryna qaýipsiz ári jarqyn bolashaq qamtamasyz ete alamyz.
