قازاقستاننىڭ باس پروكۋراتۋراسى كامەلەتكە تولماعان بالانى زورلادى جانە ءولتىردى دەپ ايىپتالعان ادامدى رەسەيدەن ەكستراديسيالادى، - دەپ حابارلايدى Dalanews.kz.
كامەلەتكە تولماعان بالانى الدىن الا ءسوز بايلاسۋ ارقىلى زورلاعانى جانە ونى ءولتىرۋدى ۇيىمداستىرعانى ءۇشىن قىلمىستىق جاۋاپتىلىققا تارتۋ ماقساتىندا رەسەي فەدەراسياسىنان قازاقستان ازاماتى ەكستراديسيالاندى.
اتالعان تۇلعا 2008 جىلى پاۆلودار وبلىسى اقسۋ قالاسىنداعى پاتەرلەردىڭ بىرىندە كامەلەتكە تولماعان بالانى زورلاعان.
وسىدان كەيىن كۇدىكتى زورلاۋ ءۇشىن جاۋاپتىلىقتان قورقىپ، تانىستارىمەن ءبىر توپ ادام بولىپ ارەكەت ەتىپ، كامەلەتكە تولماعان بالانى كۇشتەپ كولىككە وتىرعىزىپ، اۋىلدىق ايماققا الىپ كەتكەن.
جول بويىندا سىبايلاستاردىڭ ءبىرى بۇرىن ادام ولتىرگەنى ءۇشىن سوتتالعان تۇلعا بولا تۇرا، جابىرلەنۋشىنىڭ موينىن ۇستاپ، ونى تۇنشىقتىرىپ ولتىرگەن.
ادام ءولتىرۋدى جاسىرۋ ءۇشىن قاسكۇنەمدەر كامەلەتكە تولماعان بالانىڭ دەنەسىن دالاعا كومگەن.
كامەلەتكە تولماعان بالانى زورلاپ، ونى ءولتىرۋدى ۇيىمداستىرعان، قاشىپ ۇلگەرگەن جانە 15 جىل بويى حالىقارالىق ىزدەۋدە بولعان سوتتالۋشىنى قوسپاعاندا، ادام ولتىرۋگە قاتىسى بار تۇلعالار ءارتۇرلى جازا تۇرلەرىنە سوتتالدى.
وتكەن جىلعى قىركۇيەكتە ول رەسەي فەدەراسياسىنىڭ كراسنودار ولكەسىندە ۇستالىپ، كەيىن قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا قازاقستانعا ەكستراديسيالانعان.
قازىرگى ۋاقىتتا پەتروپاۆل قالاسىنىڭ تەرگەۋ يزولياتورىنا قامالدى.
وعان تاعىلعان قىلمىستاردى جاساعانى ءۇشىن ون جىلدان جيىرما جىلعا دەيىنگى مەرزىمگە باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ تۇرىندەگى جازا قاراستىرىلعان.
