تالدىقورعاندا قالالىق پوليسيانىڭ بۇرىنعى باسشىسى مارات كۇشتىبايەۆقا قاتىستى اپەللياسيالىق سوتتىڭ شەشىمى جاريالاندى، - دەپ حابارلايدى Dalanews.kz Tengrinews.kz-كە سىلتەمە جاساپ.
جەتىسۋ وبلىستىق سوتىنىڭ قىلمىستىق ىستەر جونىندەگى اپەللياسيالىق القاسى بۇرىن قىز زورلاۋ دەرەگى بويىنشا سوتتالعان بۇرىنعى جوعارى شەندى پوليسيا قىزمەتكەرىنە قاتىستى ۇكىمدى وزگەرىسسىز قالدىردى.
كابينەتىندە قىز زورلاعانى ءۇشىن 11 جىلعا سوتتالعان تالدىقورعان پوليسياسىنىڭ ەكس-باسشىسى مارات كۇشتىبايەۆ ۇكىممەن كەلىسپەيتىنىن ايتىپ، 17 شىلدەدە سوتقا اپەللياسيالىق شاعىم تۇسىرگەن.
2023 جىلعى قاراشادا تالدىقورعان پوليسياسىنىڭ باستىعى مارات كۇشتىبايەۆ 27 جاستاعى ايەلدى زورلادى دەگەن كۇدىكپەن ۇستالدى. كەيىنىرەك جابىرلەنۋشىنىڭ ادۆوكاتى وقيعانىڭ ەگجەي-تەگجەيىن ايتتى. ونىڭ ايتۋىنشا، 2023 جىلدىڭ 12 قاراشاسىندا ىشكى ىستەر باسقارماسىنا قوعامدىق ءتارتىپتى بۇزدى دەگەن ايىپپەن تالدىقورعان تۇرعىنى جەتكىزىلىپ، كەيىن ول باستىقتىڭ قىزمەتتىك كابينەتىندە زورلىق كورگەن.
بيىل ءساۋىردىڭ اياعىندا سوت ۇكىمى بويىنشا كۇشتىبايەۆ كىنالى دەپ تانىلىپ، قىلمىستىق كودەكستىڭ 120-بابى 2-بولىگىنىڭ 5-تارماعى بويىنشا 11 جىلعا باس بوستاندىعىنان ايىرىلدى. سونداي-اق، ول ماراپاتتارىنان جانە "پوليسيا پولكوۆنيگى" ارنايى اتاعىنان ايىرىلدى.
