انتيكور تالدىقورعان پوليسياسىنىڭ بۇرىنعى باسشىسى مارات كۇشتىبايەۆتىڭ ايەلىنە قاتىستى ءىستى تەرگەپ جاتىر، - دەپ حابارلايدى Dalanews.kz Tengrinews.kz-كە سىلتەپ
ال مارات كۇشتىبايەۆتىڭ ءوزى بۇعان دەيىن سوتتالىپ كەتتى. ەندى ونىڭ ايەلى جابىرلەنۋشىگە پارا بەردى دەگەن كۇدىككە ءىلىنىپ وتىر.
جەتىسۋ وبلىسى پروكۋراتۋراسىنىڭ مالىمەتىنشە، ق ر قك 422-بابى، 1-بولىگى، ياعني جابىرلەنۋشىگە پارا بەرۋ دەرەگى بويىنشا قىلمىستىق ءىستى جەرگىلىكتى سىبايلاس جەمقورلىققا قارسى قىزمەت دەپارتامەنتى تەرگەپ جاتىر.
"ءقازىر قىلمىستىق ءىس بويىنشا سوتالدى تەرگەۋ جۇرگىزىلىپ جاتىر"، - دەپ حابارلاعان پروكۋراتۋرا باسىلىم ساۋالىنا.
ايتا كەتەيىك، جۋىردا تالدىقورعان پوليسياسىنىڭ بۇرىنعى باسشىسى مارات كۇشتىبايەۆتىڭ ارتىنان تاعى ءۇش ادام تەمىر تورعا توعىتىلدى.
ولار - ەكس-پوليسەيدەن «ءجابىر كوردىم» دەگەن ايەل مەن ونىڭ تانىسى جانە تالدىقورعان سوتىنىڭ حاتشىسى.
كۇشتىبايەۆقا قاتىستى ءىس
2023 جىلعى قاراشادا تالدىقورعان پوليسياسىنىڭ بۇرىنعى باستىعى مارات كۇشتىبايەۆ 27 جاستاعى ايەلدى زورلادى دەگەن كۇدىكپەن ۇستالدى. كەيىنىرەك جابىرلەنۋشىنىڭ ادۆوكاتى وقيعانىڭ ەگجەي-تەگجەيىن ايتتى. ونىڭ سوزىنشە، 2023 جىلعى 12 قاراشادا ىشكى ىستەر باسقارماسىنا قوعامدىق ءتارتىپتى بۇزدى دەگەن ايىپپەن تالدىقورعان تۇرعىنى جەتكىزىلىپ، كەيىن ول باستىقتىڭ قىزمەتتىك كابينەتىندە زورلىق كورگەن.
كەيىن سوت ۇكىمى بويىنشا كۇشتىبايەۆ كىنالى دەپ تانىلىپ، قىلمىستىق كودەكستىڭ 120-بابى 2-بولىگىنىڭ 5-تارماعى بويىنشا 11 جىلعا باس بوستاندىعىنان ايىرىلدى.
سونداي-اق، ول ماراپاتتارىنان جانە "پوليسيا پولكوۆنيگى" ارنايى اتاعىنان ايىرىلدى.
