بەلارۋس ميليسياسىنىڭ حابارلاۋىنشا، تىلشىلەردى «قوعامدىق شارا وتكىزۋ جانە ۇيىمداستىرۋ ءتارتىبىن بۇزعانى» ءۇشىن سوتتاماقشى.

مينسك قالاسىندا نارازىلىق اكسيالارىنان حابار تاراتۋ كەزىندە ۇستالعان جۋرناليستەر سوتتالماقشى.

TUT.BY جۋرناليستەرى نادەجدا كالينينا مەن الەكسەي سۋدنيكوۆ، «كومسومولسكايا پراۆدا: بەلارۋس» جۋرناليستەرى ​سەرگەي ششەگوليەۆ، نيكيتا دۋبولەكو جانە ماريا ەلەشيەۆيچ، سونىمەن بىرگە بەلاپان ءتىلشىسى اندرەي شاۆليۋگو ءقازىر ىشكى ىستەر باسقارماسىندا وتىر.

TUT.BY باسىلىمىنىڭ حابارلاۋىنشا، وكتيابر اۋداندىق ىشكى ىستەر عيماراتىنا جۋرناليستەردى قولداۋشىلار جينالىپ جاتىر. ارىپتەستەرىن قولداعان كەيبىر جۋرناليست وسىندا تۇنەدى. مۇندا قىرىق شاقتى ادام جينالدى.

بەلارۋس جۋرناليستەر قاۋىمداستىعى ۇستالعانداردى تەز ارادا بوساتۋدى تالاپ ەتتى. «زاڭ ورەسكەل بۇزىلدى!» دەپ مالىمدەدى ۇيىم. ۇستالعان جۋرناليستەردىڭ بارلىعى مينسك قالاسىندا ءوتىپ جاتقان نارازىلىق اكسيالارىنان حابار تاراتىپ جۇرگەن.

TUT.BY باسىلىمىنىڭ حابارلاۋىنشا، سايلاۋ ناۋقانى باستالعالى بەرى بۇل سايتتىڭ جۋرناليستەرى ون شاقتى رەت ۇستالدى.