جوبانى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە قاراستى ەۋرازيا عىلىمي-زەرتتەۋ ينستيتۋتى ۇيىمداستىردى. تۇرىك ءتىلىن ۇيرەنۋ ساباقتارىنىڭ سالتاناتتى باستالۋى قازاقستان رەسپۋبليكاسى كۇنىنە جانە تۇركيا رەسپۋبليكاسىنىڭ 100 جىلدىعىنا ورايلاستىرىلعان.
ءىس-شارانىڭ اشىلۋ سالتاناتىنا تۇركيا رەسپۋبليكاسىنىڭ الماتى قالاسىنداعى باس كونسۋلى ەۋرەن مۇدەررىسوعلۋ، ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وكىلەتتى كەڭەس ءتوراعاسى، پروفەسسور، دوكتور مۇحيتتين شىمشەك، «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى، ەۋرازيالىق عىلىمي-زەرتتەۋ ينستيتۋتىنىڭ ديرەكتورى، دوكتور سۋات بەيليۋر، ق ر ورتالىق مەملەكەتتىك ءارحيۆىنىڭ ديرەكتورى، تاريح عىلىمدارىنىڭ كانديداتى س.ق. شىلدەباي، سونداي-اق ب ا ق وكىلدەرى مەن مۋزەي قىزمەتكەرلەرى قاتىستى.
تۇركيا رەسپۋبليكاسىنىڭ الماتى قالاسىنداعى باس كونسۋلى ەۋرەن مۇدەررىسوعلۋ قاتىسۋشىلاردى ۇلتتىق مەرەكە – رەسپۋبليكا كۇنىمەن قۇتتىقتاي كەلە:
- تۇركيا قازاقستاننىڭ تاۋەلسىزدىگىن العاش بولىپ مويىنداعان مەملەكەت. سودان بەرى مەملەكەتتەرىمىزدىڭ باۋىرلاستىق بايلانىستارى نىعايىپ كەلەدى. بۇگىن ءتۇبى ءبىر تۋىس ەلدەر اراسىندا تاعى ءبىر ماڭىزدى قادام جاسالدى. سەبەبى، ءتىل – حالىقتاردى جاقىنداستىرادى، جاقىن تانىپ، تەرەڭ تۇسىنۋگە جول اشادى، - دەدى.
ەۋرازيالىق عىلىمي-زەرتتەۋ ينستيتۋتىنىڭ ديرەكتورى سۋات بەيلۇر تۇرىك ءتىلىن تۇركيادان الماتىعا ارنايى كەلگەن وقىتۋشىلار ۇيرەتەتىنىن اتاپ ءوتتى. ونىڭ سوزىنشە، كۋرستى «Alatau Aqparat» مەدياحولدينگىنىڭ 20 قىزمەتكەرى، سونداي-اق ق ر ورتالىق مەملەكەتتىك ءارحيۆىنىڭ قىزمەتكەرلەرى وقيدى.
ءوز كەزەگىندە «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى تۇرىك ءتىلىن ۇيرەنۋ — 200 ميلليونداي حالقى بار تۇركى الەمىنىڭ قاقپاسىن اشۋعا جاقسى مۇمكىندىك ەكەنىن ايتتى. جوبا ناتيجەسىندە جۋرناليستەر تۇركيا جانە تۇركىتىلدەس ەلدەردىڭ جەتەكشى باق-تارىندا تاعىلىمدامادان ءوتىپ، اتالعان ەلدەردە ارى قاراي بىلىمدەرىن جەتىلدىرە الادى.
ايتا كەتەيىك، مامىر ايىندا «Alatau Aqparat» مەدياحولدينگى مەن ەۋرازيالىق عىلىمي-زەرتتەۋ ينستيتۋتى اراسىندا ىنتىماقتاستىق تۋرالى مەموراندۋمعا قول قويىلعان بولاتىن.
جۋرناليستەردىڭ ءتىل وقۋى اتالعان ارىپتەستىك قۇجاتى شەڭبەرىندە جۇزەگە اسىرىلدى. تۇرىك ءتىلىنىڭ تولىق كۋرسى 6 دەڭگەيدەن تۇرادى. ءبىر دەڭگەي 80 اكادەميالىق ساعاتقا ەسەپتەلگەن. كۋرس اياقتالعاننان كەيىن قاتىسۋشىلارعا قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى لينگۆيستيكالىق ورتالىعىنىڭ ارنايى سەرتيفيكاتتارى بەرىلەدى.
