جۋرناليست دۋمان مۇحاممەدكارىم اشتىق جاريالادى

ساعىنىش سارداروۆا 23 اقپ. 2024 10:09 2244

جۋرناليست دۋمان مۇحاممەدكارىم سوت اشىق ءوتۋىن تالاپ ەتىپ، اشتىق جاريالادى. جۋرناليست سوتقا ادۆوكاتتار قاتىسسا دا، قاتىسپاسا دا ۇكىم بەلگىلى ەكەنىن ايتىپ، قورعاۋشىلارىنان دا باس تارتقان، - دەپ حابارلايدى Dalanews.kz ازاتتىق دەرەكتەرىنە سىلتەپ.

22 اقپاندا تۇسكە دەيىن وتكەن سوت وتىرىسىنان سوڭ ادۆوكات عالىم نۇرپەيىسوۆ جۋرناليستەر مەن بەلسەندىنىڭ جاقتاستارىنا مالىمدەمە جاسادى.

"دۋمان سوت اشىق وتكەن جاعدايدا عانا اشتىعىن توقتاتاتىنىن ايتتى. سۋديانىڭ ءوزى سوت كەزىندە "سوتتالعان دۋمان" دەگەن تىركەستى ەكى رەت ايتىپ قالعان. دۋمان سوتقا بويكوت جاريالادى. دۋماننىڭ سوتقا سەنىمسىزدىك جاريالاۋ تۋرالى ءوتىنىشى قاناعاتتاندىرىلمادى"، – دەدى ادۆوكات عالىم نۇرپەيىسوۆ.

الدىڭعى سوت وتىرىسىندا سۋديا پروكۋروردىڭ سوتتى جابىق وتكىزۋ تۋرالى ءوتىنىشىن قاناعاتتاندىرىپ، سوتتى جابىق فورماتقا اۋىستىردى. بۇعان جۋرناليست پەن ونى قورعاۋ تارابى، جاقتاستارى قارسى بولعان.

راديو مالىمەتىنشە، 12 اقپاندا سوت وتىرىسى كەزىندە دۋمان مۇحاممەدكارىم "تاعىلعان ايىپتى جالا" دەپ اتاپ، "كونستيتۋسيالىق قۇقىعى بۇزىلعانىن، تەرگەۋ امالدارىنىڭ بىردە-بىرىنە قاتىسپاعانىن" ايتقان. 

"Ne Deidi" Youtube-ارناسىنىڭ اۆتورى، جۋرناليست دۋمان مۇحاممەدكارىم "ەكسترەميزمدى قارجىلاندىردى" جانە "تىيىم سالىنعان ۇيىمنىڭ جۇمىسىنا ارالاستى" دەگەن كۇدىكپەن بىلتىر ماۋسىمدا قاماۋعا الىنعان بولاتىن. ىسكە ءجۋرناليستىڭ شەتەلدە تۇراتىن "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى، وپپوزيسيونەر مۇحتار ءابليازوۆتان العان سۇحباتى سەبەپ بولعان.

قازاقستان قدت قوزعالىسىن "ەكسترەميستىك ۇيىم" دەپ تانىپ، قىزمەتىنە تىيىم سالعان. ال ەۋروپارلامەنت قدت-نى "بەيبىت وپپوزيسيالىق ۇيىم" دەپ اتايدى.


ۇسىنىلعان
سوڭعى جاڭالىقتار
x