جۋرناليست اسحات سادىربايعا قاتىستى قىلمىستىق ءىس قوزعالدى. تەرگەۋ بۇرىنعى جۇبايى ايعانىم بولات قىزىنىڭ ارىزى نەگىزىندە باستالعان، دەپ حابارلايدى Dalanews.kz.
ەكى تاراپ اراسىنداعى داۋ بىرنەشە جىلدان بەرى جالعاسىپ كەلەدى. اسحات سادىربايعا قاتىستى قىلمىستىق ءىس قوزعالعانىن تەرگەۋ ورگاندارى راستادى. ءىستى استانا قالاسى پوليسيا دەپارتامەنتىنىڭ ەسىل اۋداندىق پوليسيا باسقارماسى جۇرگىزىپ جاتىر.
استانا قالالىق پد جۋرناليستكە قاتىستى سوتقا دەيىنگى تەرگەپ-تەكسەرۋ باستالعانىن رەسمي تۇردە راستاعان.
پوليسيانىڭ جاۋابىندا 1992 جىلى تۋعان ايعانىم بولات قىزى قورابايەۆا اۋماقتىق تيەسىلىگى بويىنشا استانا قالاسى ەسىل اۋداندىق پوليسيا باسقارماسىنا ارىزدانعانى كورسەتىلگەن. ول بۇرىنعى جۇبايى، 1986 جىلى تۋعان اسحات مۇرات ۇلى سادىربايەۆقا قاتىستى شارا قولدانۋدى سۇراعان.
اتالعان ارىزعا بايلانىستى 2025 جىلعى 9 قازاندا قازاقستان رەسپۋبليكاسى قىلمىستىق كودەكسىنىڭ 110-بابىنىڭ 2-بولىگىندە كوزدەلگەن قىلمىس بەلگىلەرى بويىنشا №257116031000977 ءنومىرلى سوتقا دەيىنگى تەرگەپ-تەكسەرۋ باستالعان.
ايعانىم بولات قىزى بۇعان دەيىن بۇرىنعى كۇيەۋىنىڭ ءوزىن ازاپتاپ، ۇرىپ-سوققانى جونىندە كوپشىلىك الدىندا مالىمدەپ، قۇقىق قورعاۋ ورگاندارىنان دا، قوعامنان دا كومەك سۇراعان. ال اسحات سادىرباي بۇل ايىپتاۋلاردى جوققا شىعارىپ، ولاردى جالا دەپ اتاعان. ءتىپتى جۋرناليست ەكس-جۇبايىن سوتقا بەرىپ، جەڭىسكە جەتكەنىن دە ايتقان. الايدا ايعانىم بولات قىزى دا بۇل ءىستى توقتاتپاي، العان جاراقاتتارىن كورسەتىپ، قايتادان ارىز تۇسىرگەن.
پوليسيا مالىمەتىنشە، قازىرگى تاڭدا ءىس اياسىندا سوت-مەديسينالىق ساراپتامالار تاعايىندالىپ، سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.
سونىمەن بىرگە قىلمىستىق-پروسەستىك كودەكستىڭ 201-بابىنا سايكەس، تەرگەۋ دەرەكتەرى جاريالانبايتىنى اتاپ ءوتىلدى.
