جۋرناليست اسحات نيازوۆ قىتايدا قازاق تىلىندە سويلەي الماي، ۇياتقا قالدى، دەپ حابارلايدى Dalanews.kz.
ول الەۋمەتتىك جەلىدەگى پاراقشاسىندا قازاقستان مەن جۇڭگو شەكاراسىندا ورنالاسقان قورعاس قالالىق اۋدانىندا جۇرگەن ساتىنەن ۆيدەو جاريالاعان. كادرلاردا جۋرناليست جەرگىلىكتى تۇرعىندارمەن تىلدەسۋگە تىرىسادى.
بەينەجازبادا اسحات نيازوۆ تۇرعىندارعا ورىس تىلىندە "جالاقىلارىڭىز قانشا؟" دەگەن سۇراق قويادى. الايدا ولاردىڭ ءبىرى: "قازاقشا سويلەمەسەڭىز، تۇسىنبەيمىز"، – دەپ جاۋاپ بەرەدى.
وسىدان كەيىن ءجۋرناليستىڭ قاسىندا جۇرگەن تانىسى ونىڭ سۇراعىن قازاق تىلىنە اۋدارىپ بەرەدى. ال قىتايداعى قازاقتار: “ءبىز ءوزىمىز تابامىز. ال ەگەر جۇمىسشى جالدايتىن بولساق، ولارعا 4000 يۋان تولەيمىز”، – دەپ جاۋاپ قاتادى.
اڭگىمە سوڭىندا جەرگىلىكتى تۇرعىندار جۋرناليسكە: “قازاقشا سويلەڭدەر، قازاقپىز عوي”، – دەپ ەسكەرتۋ جاسايدى.
اتالعان جاعدايدان سوڭ اسحات نيازوۆ قاتتى ىڭعايسىز كۇيگە تۇسەدى.
“مەنى قازاقشا بىلمەگەنىم ءۇشىن قىتايداعى قانداستارىمىزدىڭ ءوزى ۇيالتتى. نە اعىلشىن ءتىلىن، نە جۇڭگو ءتىلىن، ءتىپتى قازاق ءتىلىن دە دۇرىس مەڭگەرمەگەنمىن. نە دەگەن بەيباقپىن؟” – دەپ كۇيىندى ول.
وقيعادان كەيىن الەۋمەتتىك جەلى قولدانۋشىلارى ءجۋرناليستىڭ ارەكەتىن قىزۋ تالقىلاپ، ءتۇرلى پىكىر قالدىردى. كەيبىر جەلى پايدالانۋشىلارى ونى سىنعا السا، ەندى ءبىرى كەمشىلىگىن اشىق مويىنداعانىن ەسكەرىپ، جاقتاسىپ جاتتى.
“قىتايداعى قازاقتارعا بارىپ ورىسشا سۇراق قويۋ، ۇيات قوي”، “ۇيالعاننان جەرگە كىردى-اۋ، بالا. ءبىراق كەمىستىگىن ەركەكشە مويىندادى. ول دا باتىرلىق”، “ايلىق دەگەن ءسوزدى دە ايتا المادى عوي، قازاق جىگىتى” دەپ جارىسا پىكىر ءبىلدىردى ولار.
