Jýrnalist Ashat Niiazov Qytaida qazaq tilinde sóilei almai, uiatqa qaldy, dep habarlaidy Dalanews.kz.
Ol áleýmettik jelidegi paraqshasynda Qazaqstan men Qytai shekarasynda ornalasqan Qorǵas qalalyq aýdanynda júrgen sátinen video jariialaǵan. Kadrlarda jýrnalist jergilikti turǵyndarmen tildesýge tyrysady.
Beinejazbada Ashat Niiazov turǵyndarǵa orys tilinde "Jalaqylaryńyz qansha?" degen suraq qoiady. Alaida olardyń biri: "Qazaqsha sóilemeseńiz, túsinbeimiz", – dep jaýap beredi.
Osydan keiin jýrnalistiń qasynda júrgen tanysy onyń suraǵyn qazaq tiline aýdaryp beredi. Al Qytaidaǵy qazaqtar: “Biz ózimiz tabamyz. Al eger jumysshy jaldaityn bolsaq, olarǵa 4000 iýan tóleimiz”, – dep jaýap qatady.
Áńgime sońynda jergilikti turǵyndar jýrnaliske: “Qazaqsha sóileńder, qazaqpyz ǵoi”, – dep eskertý jasaidy.
Atalǵan jaǵdaidan soń Ashat Niiazov qatty yńǵaisyz kúige túsedi.
“Meni qazaqsha bilmegenim úshin Qytaidaǵy qandastarymyzdyń ózi uialtty. Ne aǵylshyn tilin, ne qytai tilin, tipti qazaq tilin de durys meńgermegenmin. Ne degen beibaqpyn?” – dep kúiindi ol.
Oqiǵadan keiin áleýmettik jeli qoldanýshylary jýrnalistiń áreketin qyzý talqylap, túrli pikir qaldyrdy. Keibir jeli paidalanýshylary ony synǵa alsa, endi biri kemshiligin ashyq moiyndaǵanyn eskerip, jaqtasyp jatty.
“Qytaidaǵy qazaqtarǵa baryp oryssha suraq qoiý, uiat qoi”, “Uialǵannan jerge kirdi-aý, bala. Biraq kemistigin erkekshe moiyndady. Ol da batyrlyq”, “Ailyq degen sózdi de aita almady ǵoi, qazaq jigiti” dep jarysa pikir bildirdi olar.
