بۇل تۋرالى بەلارۋس پرەزيدەنتىنىڭ باسپا ءسوز قىزمەتى جاريالادى، دەپ حابارلايدى Dalanews.kz.
قۇجاتتا مەملەكەت باسشىسى قاستاندىق، لاڭكەستىك اكتىسى، سىرتقى كۇشتىڭ اگرەسسياسى، باسقا دا زورلىق-زومبىلىق ارەكەتى سالدارىنان كوز جۇمعان جاعدايدا بارلىق مەملەكەتتىك ورگاندار، ولاردىڭ لاۋازىمدى تۇلعالارى قاۋىپسىزدىك كەڭەسى شەشىمدەرىنە سايكەس ارەكەت ەتەدى دەلىنگەن.
ال قاۋىپسىزدىك كەڭەسىنىڭ وتىرىستارىنا پرەمەر-مينيستر باسشىلىق ەتەدى.
بۇل رەتتە ەل اۋماعىنا جەدەل تۇردە توتەنشە نەمەسە اسكەري جاعداي ەنگىزىلەدى. ءوز كەزەگىندە ونى قامتاماسىز ەتۋ شارالارىنىڭ ءتىزىمىن قاۋىپسىزدىك كەڭەسى انىقتايدى.
"قاۋىپسىزدىك كەڭەسىنىڭ شەشىمدەرىن بارلىعى ەش قارسىلىقسىز ورىنداۋعا مىندەتتى"، – دەيدى لۋكاشەنكو.
نەگىزگى سۇراق سايلاۋ تۋرالى بولماق. قاۋىپسىزدىك كەڭەسى گۋبەرناتورلاردىڭ قاتىسۋىمەن ونى وتكىزۋ تۋرالى شەشىم قابىلدايدى. دەكرەت ەلدىڭ تاۋەلسىزدىگى مەن ەگەمەندىگىن ساقتاۋعا باعىتتالعان. دەكرەت وعان قول قويىلعان ساتتەن باستاپ كۇشىنە ەنەدى.
پرەزيدەنت قۇزىرەتىن قاۋىپسىزدىك كەڭەسىنە بەرۋ تۋرالى قۇجاتقا قول قوياتىنىن لۋكاشەنكو وتكەن ايدا مالىمدەگەن بولاتىن.
"الدا-جالدا ءجۇرىپ كەتەر بولسام، قاراۋسىز قالاسىزدار عوي! پرەزيدەنتىنەن ايىرىلعان ەلدىڭ قاۋىپسىزدىگىن كىم قامتاماسىز ەتەدى؟ پرەزيدەنتتى اتىپ كەتكەن كۇننىڭ ەرتەسىنە ونىڭ بارشا بيلىگى قاۋىپسىزدىك كەڭەسىنىڭ قولىنا كوشەدى"، – دەگەن بولاتىن بەلارۋس باسشىسى.
ايتا كەتسەك ءساۋىردىڭ 21-ىندە لۋكاشەنكوعا قاستاندىق جاساۋدى جوسپارلادى، ەلدە توڭكەرىس ۇيىمداستىرىپ، بيلىكتى باسىپ الماق بولدى دەگەن ايىپپەن ءتورت ادام قاماۋعا الىنعان.
ءساۋىردىڭ 17-ىسىندە رەسەيدىڭ فەدەرالدى قاۋىپسىزدىك قىزمەتى بەلارۋستەگى اسكەري توڭكەرىستىڭ الدىن العانىن حابارلاعان. ۆەدومستۆو مالىمەتىنشە ساياساتتانۋشى الەكساندر فەدۋتا جانە زاڭگەر يۋريي زەنكوۆيچ باستاعان ءبىر توپ ادام لۋكاشەنكونى تاقتان تايدارۋ ءۇشىن ماسكەۋدە باس قوسىپ، جوسپار قۇرعان.
بەلارۋس پرەزيدەنتىنىڭ ايتۋىنشا 1994 جىلدان بەرى وعان 7 رەت قاستاندىق جاسالماق بولعان.
