"Júrip ketsem, qaraýsyz qalasyńdar...". Lýkashenko birtúrli jarlyqqa qol qoidy
Bul týraly Belarýs prezidentiniń baspasóz qyzmeti jariialady, dep habarlaidy Dalanews.kz.
Qujatta Memleket basshysy qastandyq, lańkestik aktisi, syrtqy kúshtiń agressiiasy, basqa da zorlyq-zombylyq áreketi saldarynan kóz jumǵan jaǵdaida barlyq memlekettik organdar, olardyń laýazymdy tulǵalary Qaýipsizdik keńesi sheshimderine sáikes áreket etedi delingen.
Al Qaýipsizdik keńesiniń otyrystaryna premer-ministr basshylyq etedi.
Bul rette el aýmaǵyna jedel túrde tótenshe nemese áskeri jaǵdai engiziledi. Óz kezeginde ony qamtamasyz etý sharalarynyń tizimin Qaýipsizdik keńesi anyqtaidy.
"Qaýipsizdik keńesiniń sheshimderin barlyǵy esh qarsylyqsyz oryndaýǵa mindetti", – deidi Lýkashenko.
Negizgi suraq sailaý týraly bolmaq. Qaýipsizdik keńesi gýbernatorlardyń qatysýymen ony ótkizý týraly sheshim qabyldaidy. Dekret eldiń táýelsizdigi men egemendigin saqtaýǵa baǵyttalǵan. Dekret oǵan qol qoiylǵan sátten bastap kúshine enedi.
Prezident quziretin Qaýipsizdik keńesine berý týraly qujatqa qol qoiatynyn Lýkashenko ótken aida málimdegen bolatyn.
"Alda-jalda júrip keter bolsam, qaraýsyz qalasyzdar ǵoi! Prezidentinen aiyrylǵan eldiń qaýipsizdigin kim qamtamasyz etedi? Prezidentti atyp ketken kúnniń ertesine onyń barsha biligi Qaýipsizdik keńesiniń qolyna kóshedi", – degen bolatyn Belarýs basshysy.
Aita ketsek sáýirdiń 21-inde Lýkashenkoǵa qastandyq jasaýdy josparlady, elde tóńkeris uiymdastyryp, bilikti basyp almaq boldy degen aiyppen tórt adam qamaýǵa alynǵan.
Sáýirdiń 17-isinde Reseidiń Federaldy Qaýipsizdik qyzmeti Belarýstegi áskeri tóńkeristiń aldyn alǵanyn habarlaǵan. Vedomstvo málimetinshe saiasattanýshy Aleksandr Fedýta jáne zańger Iýrii Zenkovich bastaǵan bir top adam Lýkashenkony taqtan taidarý úshin Máskeýde bas qosyp, jospar qurǵan.
Belarýs prezidentiniń aitýynsha 1994 jyldan beri oǵan 7 ret qastandyq jasalmaq bolǵan.
