بيىل ەلىمىزدە مەملەكەت باسشىسىنىڭ جارلىعىمەن «جۇمىسشى ماماندىقتار جىلى» دەپ جاريالاندى. تۇركىستان وبلىسى اكىمىنىڭ ورىنباسارى بەيسەنباي تاجىبايەۆتىڭ توراعالىعىمەن وتكەن ماڭىزدى باسقوسۋدا وسى باعىتتا اتقارىلاتىن جوسپارلار تانىستىرىلىپ، وندىرىستىك جانە الەۋمەتتىك سالالاردا جۇمىسشى ماماندىقتارىنىڭ ءيميدجىن كوتەرۋ ءۇشىن ءتۇرلى شارالار وتكىزىلەتىنى ايتىلدى، - دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
"ءوڭىر باسشىسى نۇرالحان ورالباي ۇلى ايماقتا اشىلعان جانە ەندى اشىلاتىن ءوندىرىس ورىندارىندا جۇمىس ىستەيتىن جاستاردى دايارلاۋدى تاپسىردى. وسى ماسەلە باستى نازاردا بولۋى ءتيىس. تۇركىستان وبلىسىندا «جۇمىسشى ماماندىقتار جىلىن» جىلىن وتكىزۋ جونىندەگى وڭىرلىك جوسپار بەكىتىلدى. جوسپار 7 باعىت، 64 قادامنان تۇرادى. باستى مىندەتىمىز – جۇمىسشى كادرلاردى دايارلاۋ جۇيەسىن جەتىلدىرۋ، جۇمىس بەرۋشىلەردىڭ جۇمىسشى ماماندىقتارى كادرلارىن دايارلاۋعا جانە قولداۋعا قاتىسۋىن ارتتىرۋ جانە ءيميدجىن كوتەرۋ. سالالىق باسقارمالار، اۋداندىق، قالالىق اكىمدىكتەر مەن تەحنيكالىق جانە كاسىپتىك ءبىلىم بەرۋ ۇيىمدارى بىرلەسە جۇمىس اتقارادى. سونىمەن قاتار سالالىق باسقارمالار مەن اكىمدىكتەر وزدەرىنىڭ جوسپارلارىن جاساپ، الەۋمەتتىك باعدارلامالار ارقىلى جۇمىسشىلارعا قولداۋ كورسەتەدى. ءوڭىردىڭ ەڭبەك نارىعىنا بولاشاقتاعى سۇرانىسقا يە «ماماندىقتار اتلاسى» جاسالادى. وسى باعىتتاعى جۇمىستاردى كۇشەيتۋىمىز كەرەك"، – دەدى بەيسەنباي داۋلەت ۇلى.
تۇركىستان وبلىسى ءبىلىم باسقارماسى باسشىسىنىڭ ورىنباسارى ايگۇل قاسىمبەكوۆا وسى باعىت بويىنشا اتقارىلىپ جاتقان جۇمىستاردى باياندادى. ونىڭ ايتۋىنشا، كاسىپورىنداردا-كاسىبي باعدار، ورتا، ءىرى بيزنەس وكىلدەرىنىڭ قاتىسۋىمەن اشىق ەسىك كۇندەرى جانە «بوس جۇمىس ورىندارى» جارمەڭكەلەرى مەن ەكسكۋرسيالار ۇيىمداستىرىلادى. «Mamandyk Fest» فەستيۆالى، «ماماندىقتار جارمەڭكەسى»، «دۋبلەر كۇنى» جوباسى، «One School One Skill» (ءبىر مەكتەپ - ءبىر داعدى) جوباسى، «Jas SkillsTurkistan»، «Junior Skills Turkistan» كاسىبي شەبەرلىك كونكۋرستارى مەن پاندىك وليمپيادالار قولعا الىندى. جاستاردىڭ اراسىندا «جۇمىسشىنىڭ ءبىر كۇنى» ايماقتىق جۇمىسشى ماماندىقتار جارمەڭكەسى، «جۇمىسشى ماماندىعى – تابىستى بولاشاقتىڭ كىلتى» فورۋمى، «مەن كاسىپكەرمىن!» وبلىستىق كونكۋرس، «ناۋرىزFEST»، فەستيۆالى، «بيزنەسيدەيا» بايقاۋى، «چەمپيوندار» جانە «ەڭبەك كۋبوگى» سپارتاكيادالارى جانە تاعى باسقا ءىس-شارالار جىل بويى وتكىزىلەدى.
سونىمەن قاتار بيىل «ءبىر كوللەدج – ءبىر ءونىم» دەپ اتالاتىن جوبا ەنگىزە وتىرىپ، 5 كوللەدجدىڭ بازاسىندا سەحتار اشىپ، كىشى كاسىپورىندارعا اينالدىرۋ جۇمىسى اتقارىلاۋدا. بىلىكتى جۇمىسشى مامان دايىنداۋدىڭ قۇرالى بولىپ سانالاتىن دۋالدى وقىتۋ قولعا الىنعان. بۇگىنگى تاڭدا، 35 كوللەدجدە دۋالدىق وقىتۋ جۇيەسىمەن 64 ماماندىق بويىنشا 654 ورتا جانە كىشى كاسىپورىننىڭ قاتىسۋىمەن 10 353 ءبىلىم الۋشى قامتىلعان.
ينۆەستورلار مەن كاسىپورىنداردىڭ سۇرانىسى نەگىزىندە جاڭا ماماندىقتاردى اشۋ بويىنشا جۇمىستار جۇرگىزىلەدى. مەكتەپتەردە 10 بەيىندىك سىنىپتار جانە قوسىمشا ءبىلىم بەرۋ ۇيىمدارىندا تەحنيكالىق كلۋبتار اشىلادى. كوللەدجدەرگە رەبرەندينگ جاساۋ، ياعني ءبىلىم مەكەمەلەرىنىڭ ءيميدجىن كوتەرۋ جانە جۇمىس بەرۋشىلەرمەن ىنتىماقتاستىقتى نىعايتۋ جۇمىستارى جۇرگىزىلەدى.
2024-2025 وقۋ جىلىندا 15 525 مەملەكەتتىك تاپسىرىس ورنالاستىرىلعان. ونىڭ ىشىندە 8 678ء-ى – جۇمىسشى ماماندىقتارى. 2025-2026 وقۋ جىلىنا 15500 مەملەكەتتىك تاپسىرىس جوسپارلانعان. سونىڭ ىشىندە جۇمىسشى ماماندىقتارىنىڭ سانىن 9500-گە ۇلعايتۋ جوسپارلانىپ وتىر.
