پرەمەر-مينيستردىڭ ورىنباسارى سەرىك جۇمانعارين قازاقستاندا ءبىرىڭعاي ۋاقىت بەلدەۋىنىڭ ەنگىزىلۋى جانە ونىڭ ادامدارعا اسەرى تۋرالى سۇراققا جاۋاپ بەردى، دەپ حابارلايدى Dalanews.kz.
“الەمدىك تاجىريبەگە سۇيەنسەك، ۇكىمەت دۇرىس شەشىم قابىلدادى دەپ ەسەپتەيمىز. بۇعان ءبىرقاتار دالەل بار. حالىقارالىق بەدەلدى ينستيتۋتتار مەن عالىمدار بۇل شەشىمدى قولدادى. 2022 جىلى بارسەلونا دەكلاراسياسىنا 80-نەن استام ۇيىم مەن بىرنەشە عالىم قول قويعان. سول سەبەپتى بۇل ماسەلە بويىنشا ءبىزدىڭ ۇستانىمىمىز وزگەشە بولمايدى. ۇكىمەت ءوز شەشىمىن قولدايدى”، – دەدى جۇمانعارين.
سونداي-اق ول شىعىس وڭىرىندەگى تۇرعىنداردىڭ بۇرىنعى ۋاقىت بەلدەۋىن قايتارۋ تۋرالى تالابىنا توقتالدى.
“تۇرعىنداردىڭ نارازىلىعىنا باسقا دا سەبەپتەر بار. ماسەلەن، قاراڭعى تۇسكەن كەزدە كوشەلەردە جارىقتىڭ قوسىلماۋى، ينفراقۇرىلىم تاپشىلىعى، جولداعى قاردىڭ تازالانباۋى سىندى ماسەلەلەر نازارعا الىنۋى كەرەك. مۇنداي جاعدايدا تۇرعىندارعا قولايلى ورتا قالىپتاستىرۋ ماڭىزدى. سونىمەن قاتار جۇمىس ۋاقىتىن ەرتە باستاپ، ەرتەرەك اياقتاۋ بويىنشا دا وزگەرىستەر ەنگىزۋ مۇمكىن. بۇل ماسەلەلەردى شەشۋگە تىرىسامىز”، – دەپ اتاپ ءوتتى ۇكىمەت باسشىسىنىڭ ورىنباسارى.
سونىمەن بىرگە جۇمانعارين قازاقستاندا ءبىرىڭعاي ۋاقىت بەلدەۋىنىڭ ادامدارعا اسەرى بويىنشا زەرتتەۋ جۇرگىزىلەتىنىن ايتتى.
“ناقتى قانداي شەشىم قابىلداناتىنى زەرتتەۋ ناتيجەسىنە بايلانىستى بولادى. مۇندا حالىقارالىق تاجىريبە مەن قازاقستاننىڭ جاعدايىن جان-جاقتى سالىستىرامىز”، – دەدى جۇمانعارين.
