Premer-ministrdiń orynbasary Serik Jumanǵarin Qazaqstanda biryńǵai ýaqyt beldeýiniń engizilýi jáne onyń adamdarǵa áseri týraly suraqqa jaýap berdi, dep habarlaidy Dalanews.kz.
“Álemdik tájiribege súiensek, Úkimet durys sheshim qabyldady dep esepteimiz. Buǵan birqatar dálel bar. Halyqaralyq bedeldi institýttar men ǵalymdar bul sheshimdi qoldady. 2022 jyly Barselona deklaratsiiasyna 80-nen astam uiym men birneshe ǵalym qol qoiǵan. Sol sebepti bul másele boiynsha bizdiń ustanymymyz ózgeshe bolmaidy. Úkimet óz sheshimin qoldaidy”, – dedi Jumanǵarin.
Sondai-aq ol shyǵys óńirindegi turǵyndardyń burynǵy ýaqyt beldeýin qaitarý týraly talabyna toqtaldy.
“Turǵyndardyń narazylyǵyna basqa da sebepter bar. Máselen, qarańǵy túsken kezde kóshelerde jaryqtyń qosylmaýy, infraqurylym tapshylyǵy, joldaǵy qardyń tazalanbaýy syndy máseleler nazarǵa alynýy kerek. Mundai jaǵdaida turǵyndarǵa qolaily orta qalyptastyrý mańyzdy. Sonymen qatar jumys ýaqytyn erte bastap, erterek aiaqtaý boiynsha da ózgerister engizý múmkin. Bul máselelerdi sheshýge tyrysamyz”, – dep atap ótti Úkimet basshysynyń orynbasary.
Sonymen birge Jumanǵarin Qazaqstanda biryńǵai ýaqyt beldeýiniń adamdarǵa áseri boiynsha zertteý júrgiziletinin aitty.
“Naqty qandai sheshim qabyldanatyny zertteý nátijesine bailanysty bolady. Munda halyqaralyq tájiribe men Qazaqstannyń jaǵdaiyn jan-jaqty salystyramyz”, – dedi Jumanǵarin.
