ماڭعىستاۋدا سپورت باسقارماسىنىڭ بۇرىنعى باسشىسى قانات جۇمابايەۆقا قاتىستى قىلمىستىق ءىس اياقتالدى. ەكس-شەنەۋنىككە 2 917 000 تەڭگە ايىپپۇل سالىندى. بۇل اقپاراتتى ماڭعىستاۋ وبلىستىق سوتى جاريالادى، - دەپ حابارلايدى Dalanews.kz.
قىلمىستىق ءىستىڭ ناتيجەسىندە ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسىنىڭ ەكس-باسشىسى مەن "كاسپيي" فۋتبول كلۋبىنىڭ ديرەكتورىنا ايىپپۇل سالىندى.
"سوت القاسى قانات جۇمابايەۆقا 2 917 000 تەڭگە ايىپپۇل سالدى. "كاسپيي" فۋتبول كلۋبىنىڭ ديرەكتورىنا بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، 2 333 600 تەڭگە ايىپپۇل سالىندى"، - دەپ جازىلعان حابارلامادا.
ايتا كەتەيىك، قانات جۇمابايەۆ 2022 جىلى تامىزدا جۇمىس ورنىندا ۇستالدى. بىلتىر مامىردا سىبايلاس جەمقورلىققا قارسى قىزمەت ۇستاعان سپورت جانە دەنە شىنىقتىرۋ باسقارماسىنىڭ بۇرىنعى باسشىسى قانات جۇمابايەۆقا قاتىستى سوت پروسەسى اياقتالدى. ءبىراق بۇل كەزدە سوت قانات جۇمابايەۆتى اقتاپ شىقتى.
2023 جىلعى شىلدەدە قانات جۇمابايەۆ اقتالعان سوڭ ماڭعىستاۋ وبلىسىنىڭ سپورت جانە دەنە شىنىقتىرۋ باسقارماسىنىڭ باسشىسى قىزمەتىنە قايتا ورالدى. الايدا ءۇش اي وتكەن سوڭ قىزمەتىنەن كەتتى.
ال سول جىلى قازاندا وبلىستىق سپورت باسقارماسىنىڭ ەكس-باسشىسىنا قاتىستى قىلمىستىق ءىس قايتا جاڭا سوت تالقىلاۋىنا جىبەرىلدى.
