ۆيسە-پرەمەر، ۇلتتىق ەكونوميكا ءمينيسترى سەرىك جۇمانعارين شەگىرتكە ماسەلەسىنە قاتىستى پىكىر ءبىلدىردى. بۇل جاندىكتەردىڭ كوبەيۋى بيىل شارۋالاردى الاڭداتىپ وتىر. جۋرناليستەر مينيستردەن بۇعان دەيىن ءوزى ايتقان "شەگىرتكە حالال ءونىم" دەگەن مالىمدەمەسىن ناقتىلاۋىن سۇرادى، دەپ حابارلايدى Dalanews.kz.
"مەن شەگىرتكە حالال ءونىم دەپ ايتتىم. ءبىراق مەن ونى جەڭدەر دەپ پە ەدىم؟ تاعى دا نە ويلاپ تاۋىپ وتىرسىزدار؟!"، - دەدى مينيستر.
ءجۇمانعاريننىڭ ايتۋىنشا، شەگىرتكەدەن تولىقتاي قۇتىلۋ مۇمكىن ەمەس، ويتكەنى ول ەكوجۇيەنىڭ ءبىر بولىگى.
"ءبىزدى قورشاعان ورتادا ميكرواعزالار مەن جاندىكتەر ءومىر سۇرەدى. كوبەلەكتەر اۋادا ۇشادى، قۇستار اسپاندا قالىقتايدى. ءبىراق ەندى ءبارىن جويىپ تاستايىق پا، ويتكەنى ولار بىزگە كەدەرگى كەلتىرەدى ەكەن؟ شەگىركە بىزبەن بىرگە ءومىر ءسۇرىپ كەلە جاتىر. مەن ايتتىم عوي، ول مامونتتارمەن قۇرداس شىعار. سول سەبەپتى ءار 12 جىل سايىن بەلسەندىلىك پەن كوبەيۋ كەزەڭى قايتالانىپ وتىرادى. ءقازىر سول ەكى جىلدىق سيكلدىڭ سوڭىندا تۇرمىز. كەلەر جىلى مۇنداي بەلسەندىلىك بولمايدى"، - دەدى ول.
ءمينيستردىڭ ايتۋىنشا، تۇركىستان مەن قىزىلوردا وبلىستارىنداعى كۇرەس شارالارى اياقتالۋعا جاقىن، ەگىستىك القاپتارعا ءقاۋىپ جوق. ءقازىر باستى نازار اقتوبە مەن قوستاناي وبلىستارىنىڭ شەكارالارىنا، سونداي-اق رەسەيمەن شەكارالاس وڭىرلەرگە اۋدارىلىپ وتىر.
شەگىرتكەگە قارسى كۇرەسكە رەسپۋبليكالىق بيۋدجەتتەن 7،1 ملرد تەڭگە قاراجات بولىنگەن.
