«نۇرىم گرۋپپ» جاۋاپكەرشىلىگى شەكتەۋلى سەرىكتەستىگىنىڭ مال بورداقىلاۋ كەشەنىندە قوسىمشا قۇراما جەم شىعاراتىن سەح جانە مال سويۋ الاڭى دا قاراستىرىلعان. اۋدانعا ارنايى ساپارمەن بارعان وبلىس اكىمى ج.تۇيمەبايەۆ اتالعان نىسانعا ايالداپ، سەرىكتەستىكتىڭ الداعى جۇمىس جوسپارىمەن تانىستى.
سايرام اۋدانىنىڭ اۋىل شارۋاشىلىعى سالاسى نەگىزىنەن مال شارۋاشىلىعى مەن كوكونىس وسىرۋگە باعىتتالعانىن ايتقان ايماق باسشىسى بۇل كەشەن ىسكە قوسىلسا، ەلدەگى ەت ەكسپورتى ارتاتىنىن اتاپ ءوتتى.
– اۋدانداعى اۋىل شارۋاشىلىعى سالاسىندا جىل باسىنان بەرى وندىرىلگەن ءونىم كولەمى 15 ملرد. تەڭگەدەن اسقان. ال، وسى ۋاقىت ىشىندە 11 مىڭ توننا شاماسىندا ەت، 51 مىڭ توننا ءسۇت، 7 ملن. دانا جۇمىرتقا وندىرىلگەن. قۇرىلىس جۇمىستارى جۇرگىزىلىپ جاتقان كەشەن اۋدانداعى ەڭ ءىرى مال بورداقىلاۋ الاڭىنىڭ ءبىرى بولىپ وتىر. وسى قارقىنمەن جۇمىستى جالعاستىرا وتىرىپ، وڭدەۋ ونەركاسىبىنە كوڭىل ءبولىپ، مالدى تىرىدەي ساتۋدان بولەك ونىڭ ەتىن تەرەڭ وڭدەپ ساتۋ ماسەلەسىن دە قولعا الۋ قاجەت، – دەدى وبلىس اكىمى.
ال، كەشەننىڭ قۇرىلىسىمەن تانىستىرعان كاسىپكەر س.ەرتايەۆ كەشەنى ىسكە قوسقاندا ەت ەكسپورتى كولەمىنىڭ ارتتىراتىندىعىن ايتتى.
– قىركۇيەك ايىندا مال بورداقىلاۋ جۇمىسىن باستايمىز. جۇمىس جوسپار بويىنشا جۇرگەندە كۇنىنە 100 باس سيىردىڭ ەتىن وندىرۋگە قول جەتكىزەمىز. قازىرگى تاڭدا، ەت ەكسپورتاۋعا قاتىستى يران جانە وزبەكستان ەلدەرىمەن كەلىسىم-شارت ءتۇزىلدى. ءبىزدىڭ ونىمدەرگە دەگەن سۇرانىس وتە جوعارى. ازىرگە ءتىپتى ۇلگەرە الماي جاتىرمىز دەپ ايتۋعا بولادى. ماسەلەن، جىل باسىنان بەرى وزبەكستانعا جالپى 800 توننا، يرانعا 200 توننا ەت جونەلتىلدى، – دەدى كاسىپكەر.
جوبا قۇنى 3،456 ملرد. تەڭگەنى قۇرايدى. 80 ادام جۇمىسپەن قامتىلىپ وتىرعان كەشەندە جىلىنا 5000 توننا ەت وندىرىلەدى.
ايتا كەتەيىك، جالپى اۋداندا 300 باستان جوعارى ءىرى قارا بورداقىلايتىن 33 الاڭشا بار. ال، جالپى مال بورداقىلاۋ الاڭشالارىنىڭ سانى 900-گە جۋىقتايدى.
سونداي-اق، ءوڭىر باسشىسى اۋدانعا ساپارى بارىسىندا شەتەلدەردەن كەلگەن ەرىكتىلەرمەن كەزدەسىپ، جۇمىسشى توپتىڭ اتقارىپ جاتقان جۇمىستارىمەن تانىستى. سونىمەن قاتار، ەرىكتىلەرگە العىس بىلدىرگەن وبلىس اكىمى توپتىڭ ءبىرقاتار مۇشەلەرىن ماراپاتتادى.
قۇرامىندا دارىگەر، قۇرىلىسشى سىندى ءتۇرلى سالانىڭ مامانى بار ەرىكتىلەر توبىنىڭ سايرام اۋدانىنا كەلگەنىنە 3 اپتانىڭ ءجۇزى بولعان. ولار مۇندا الەۋمەتتىك از قامتىلعان وتباسىلارعا ءتۇرلى باعىتتا اقىسىز تۇردە كومەك كورسەتۋمەن اينالىسىپ كەلەدى. شەتەلدىك قايىرىمدى جاندار ەلىمىزدە تاعى 2،5 ايعا دەيىن بولىپ، مۇقتاج جاندارعا قول ۇىن سوزۋدى جوسپارلاپ وتىر.
تۇركىستان وبلىسى اكىمىنىڭ باسپا ءسوز قىزمەتى
