فورۋم بارىسىندا ايماق باسشىسى وڭتۇستىك قازاقستان وبلىسىنىڭ ينۆەستيسيالىق الەۋەتىن تانىستىرىپ، ينۆەستيسيالىق جوبالاردى تابىستى جۇزەگە اسىرۋ ءۇشىن قۇرىلعان مۇمكىندىكتەردى اتاپ ءوتتى. سونىمەن قاتار ءاربىر جوبانى جەكە ءوز تاراپىنان قولداۋعا دايىن ەكەندىگىن جەتكىزدى.
— وڭتۇستىك قازاقستان وبلىسى — ەكونوميكالىق الەۋەتى زور، تۇراقتى دامىپ كەلە جاتقان ءوڭىر. ايماق ورتا ازيا، تاياۋ شىعىس پەن ەۋروپا ەلدەرىن بايلانىستىراتىن جولداردىڭ قيىلىسىندا ورنالاسقان، سونىڭ ناتيجەسىندە شەكارالىق ساۋدا-ساتتىق پەن ەكسپورتتىق ءوندىرىس دامىپ كەلەدى.
تاريحي ولكەنىڭ اگرارلى سالاسى جاقسى دامىعان. سوڭعى 3 جىلدا جينالعان باقشا ونىمدەرىنىڭ كولەمى 1 ميلليون توننادان اسىپ تۇسەدى. قازاقستانداعى جىلىجايدىڭ 90 پايىزى ءبىزدىڭ وڭىردە ورنالاسقان. ماقتا تولىعىمەن، ال ءجۇزىم مەن باقشا ونىمدەرىنىڭ 70 پايىزى وسى وبلىستا وسىرىلەدى. يندۋستريالاندىرۋ بويىنشا ەلىمىزدەگى جۇزەگە اسىپ جاتقان ءاربىر بەسىنشى جوبا وڭتۇستىك قازاقستان وبلىسىنا تيەسىلى. سوڭعى 8 جىل ىشىندە وڭىردە جالپى قۇنى 735 ملن. اقش دوللارىنان استام قارجىعا 175 جوبا ىسكە قوسىلعان. سونداي-اق، ينۆەستيسيا كولەمى 3،6 ملرد. اقش دوللارىن قۇرايتىن 75 جوبا 2020 جىلعا دەيىن جۇزەگە اسادى، — دەدى وبلىس اكىمى ج.تۇيمەبايەۆ.
سونىمەن قوسا ءوڭىر ەكونوميكاسى ءارتاراپتاندىرىلعانىن ايتقان اكىم وبلىستا 177 مىڭنان استام بيزنەس سۋبەكتىلەرى تىركەلگەنىن ءمالىم ەتتى. سونداي-اق، وبلىستا شەتەلدىك ينۆەستورلار ءۇشىن ءتيىمدى بولاتىن يندۋستريالدى-يننوۆاسيالىق باعدارلاما اياسىندا 11 يندۋستريالدىق جانە 1 ارنايى ەكونوميكالىق ايماق جۇمىس ىستەيتىنىن اتاپ ءوتتى.
وڭتۇستىك قازاقستان وبلىسىنىڭ اكىمى باستاپ بارعان كاسىپكەرلەر مەن دامۋ ينستيتۋتتارىنان قۇرالعان دەلەگاتتار POSCO DAEWOO، HANWHA GROUP، HYUNDAI CORPORATION جانە LS Cable & System سەكىلدى وڭتۇستىك كورەيانىڭ ترانسۇلتتىق كومپانيالارىمەن ءبىرقاتار ماڭىزدى كەزدەسۋلەر وتكىزدى.
كەزدەسۋ بارىسىندا وڭتۇستىكقازاقستاندىق دەلەگاتتار كورەي ينۆەستورلارىنا ءوڭىردىڭ پەرسپەكتيۆتى سالالارىن ۇسىندى. سونداي-اق، كەلىسسوزدەر بارىسىندا تاراپتار وڭىردە جۇزەگە اساتىن جاڭارتىلاتىن ەنەرگيا كوزدەرى مەن مەتاللۋرگيا جانە سيفرلىق تەحنولوگيالار، سونىڭ ىشىندە قۇرىلىس سالاسىنداعى وزىق تەحنولوگيالار سالاسىنداعى بىرلەسكەن جوبالاردى تالقىلادى.
ەكى جاقتى قارىم-قاتىناستىڭ جوعارى دەڭگەيىن اتاپ وتكەن ايماق باسشىسى ءقازىردىڭ وزىندە وڭتۇستىك قازاقستاندا وڭتۇستىك كورەيانىڭ ءىرى كومپانيالارى جۇمىس ىستەپ جاتقانىن جانە الەۋەتتى ينۆەستورلاردى جوبانىڭ ىسكە اسىرىلۋىنا دەيىن قولداۋ بىلدىرەتىن وڭىرلىك دامۋ ينستيتۋتتارىمەن جۇمىسىن جانداندىرۋعا شاقىردى.
بۇدان بولەك، وڭتۇستىك كورەيانىڭ ءىرى كاسىپورىندارىنىڭ ءبىرى بولىپ تابىلاتىن HANWHA GROUP كومپانياسىمەن سارىاعاش اۋدانىندا كۋرورتتىق ايماق قۇرۋ بويىنشا جانە ەنەرگەتيكا سالاسىنداعى پەرسپەكتيۆالىق جوبالار تالقىلاندى. سونداي-اق، ەنەرگەتيكا سالاسىن دامىتۋ بويىنشا جوبالار ينفراقۇرىلىمدى ەلەكترمەن جابدىقتاۋ جانە ازىق-تۇلىك ءوندىرىسى ءۇشىن رەسۋرستىق بازانى قۇرۋ بويىنشا الەمدىك تاجىريبەگە يە كورەيانىڭ POSCO DAEWOO كورپوراسياسىمەن كەلىسسوزدەر جۇرگىزىلدى. سونىمەن قاتار وبلىس اكىمنىڭ شاقىرتۋىن كابەل ءوندىرۋشى وسى سالاداعى الەمدەگى ەڭ ۇزدىك تەحنولوگيالارعا يە LS Cable & System كومپانياسى الدى.
فورۋمنىڭ ەكىنشى كۇنى وبلىس اكىمى ج.تۇيمەبايەۆ سەۋل قالاسىنىڭ ۆيسە-مەرىمەن كەزدەستى. كەزدەسۋ بارىسىندا تاراپتار قالا قۇرىلىسى جوبالارىنداعى زاماناۋي ينفراقۇرىلىمدىق شەشىمدەر جايىن ءسوز ەتتى. وسى رەتتە وبلىس اكىمى ەكى جاقتى ارىپتەستىكتى تالقىلاۋ ماقساتىندا سەۋل قالاسىنىڭ اكىمىن وڭتۇستىك قازاقستان وبلىسىنا شاقىردى.
وقو اكىمىنىڭ باسپا ءسوز قىزمەتى
