Forým barysynda aimaq basshysy Ońtústik Qazaqstan oblysynyń investitsiialyq áleýetin tanystyryp, investitsiialyq jobalardy tabysty júzege asyrý úshin qurylǵan múmkindikterdi atap ótti. Sonymen qatar árbir jobany jeke óz tarapynan qoldaýǵa daiyn ekendigin jetkizdi.
— Ońtústik Qazaqstan oblysy — ekonomikalyq áleýeti zor, turaqty damyp kele jatqan óńir. Aimaq Orta Aziia, Taiaý Shyǵys pen Eýropa elderin bailanystyratyn joldardyń qiylysynda ornalasqan, sonyń nátijesinde shekaralyq saýda-sattyq pen eksporttyq óndiris damyp keledi.
Tarihi ólkeniń agrarly salasy jaqsy damyǵan. Sońǵy 3 jylda jinalǵan baqsha ónimderiniń kólemi 1 million tonnadan asyp túsedi. Qazaqstandaǵy jylyjaidyń 90 paiyzy bizdiń óńirde ornalasqan. Maqta tolyǵymen, al júzim men baqsha ónimderiniń 70 paiyzy osy oblysta ósiriledi. Indýstriialandyrý boiynsha elimizdegi júzege asyp jatqan árbir besinshi joba Ońtústik Qazaqstan oblysyna tiesili. Sońǵy 8 jyl ishinde óńirde jalpy quny 735 mln. AQSh dollarynan astam qarjyǵa 175 joba iske qosylǵan. Sondai-aq, investitsiia kólemi 3,6 mlrd. AQSh dollaryn quraityn 75 joba 2020 jylǵa deiin júzege asady, — dedi oblys ákimi J.Túimebaev.
Sonymen qosa óńir ekonomikasy ártaraptandyrylǵanyn aitqan əkim oblysta 177 myńnan astam biznes sýbektileri tirkelgenin məlim etti. Sondai-aq, oblysta sheteldik investorlar úshin tiimdi bolatyn Indýstrialdy-innovatsiialyq baǵdarlama aiasynda 11 indýstrialdyq jáne 1 arnaiy ekonomikalyq aimaq jumys isteitinin atap ótti.
Ońtústik Qazaqstan oblysynyń ákimi bastap barǵan kásipkerler men damý institýttarynan quralǵan delegattar POSCO DAEWOO, HANWHA GROUP, HYUNDAI CORPORATION jáne LS Cable & System sekildi Ońtústik Koreianyń transulttyq kompaniialarymen birqatar mańyzdy kezdesýler ótkizdi.
Kezdesý barysynda ońtústikqazaqstandyq delegattar korei investorlaryna óńirdiń perspektivti salalaryn usyndy. Sondai-aq, kelissózder barysynda taraptar óńirde júzege asatyn jańartylatyn energiia kózderi men metallýrgiia jáne tsifrlyq tehnologiialar, sonyń ishinde qurylys salasyndaǵy ozyq tehnologiialar salasyndaǵy birlesken jobalardy talqylady.
Eki jaqty qarym-qatynastyń joǵary deńgeiin atap ótken aimaq basshysy qazirdiń ózinde Ońtústik Qazaqstanda Ońtústik Koreianyń iri kompaniialary jumys istep jatqanyn jáne áleýetti investorlardy jobanyń iske asyrylýyna deiin qoldaý bildiretin óńirlik damý institýttarymen jumysyn jandandyrýǵa shaqyrdy.
Budan bólek, Ońtústik Koreianyń iri kásiporyndarynyń biri bolyp tabylatyn HANWHA GROUP kompaniiasymen Saryaǵash aýdanynda kýrorttyq aimaq qurý boiynsha jáne energetika salasyndaǵy perspektivalyq jobalar talqylandy. Sondai-aq, energetika salasyn damytý boiynsha jobalar infraqurylymdy elektrmen jabdyqtaý jáne azyq-túlik óndirisi úshin resýrstyq bazany qurý boiynsha álemdik tájiribege ie Koreianyń POSCO DAEWOO korporatsiiasymen kelissózder júrgizildi. Sonymen qatar oblys ákimniń shaqyrtýyn kabel óndirýshi osy saladaǵy álemdegi eń úzdik tehnologiialarǵa ie LS Cable & System kompaniiasy aldy.
Forýmnyń ekinshi kúni oblys ákimi J.Túimebaev Seýl qalasynyń vitse-merimen kezdesti. Kezdesý barysynda taraptar qala qurylysy jobalaryndaǵy zamanaýi infraqurylymdyq sheshimder jaiyn sóz etti. Osy rette oblys ákimi eki jaqty áriptestikti talqylaý maqsatynda Seýl qalasynyń ákimin Ońtústik Qazaqstan oblysyna shaqyrdy.
OQO ákiminiń baspasóz qyzmeti
