جول قۇرىلىسى ماتەريالدارىنىڭ ساپاسىن باقىلاۋ – جولدىڭ ۇزاق مەرزىم قىزمەت ەتۋىنىڭ نەگىزگى كەپىلى. وسى ماقساتتا «جول اكتيۆتەرى ساپاسىنىڭ ۇلتتىق ورتالىعى» رمك الماتى قالالىق فيليالىنىڭ ينجەنەرلەرى اسفالتبەتون زاۋىتىندا تەكسەرۋ جۇمىستارىن جۇرگىزىپ، جول قۇرىلىسىنا پايدالانىلاتىن ماتەريالداردان سىناما الدى، دەپ حابارلايدى Dalanews.kz
ماماندار اسفالت قوسپاسىنىڭ قۇرامى مەن ساپالىق كورسەتكىشتەرىنىڭ بەلگىلەنگەن تالاپتارعا سايكەستىگىن انىقتاۋ ءۇشىن بىرنەشە ۇلگى جينادى. الىنعان سىنامالار ارنايى زەرتحاناعا جىبەرىلىپ، وندا فيزيكا-مەحانيكالىق كورسەتكىشتەرى بويىنشا كەشەندى ساراپتامادان وتەدى. زەرتحانالىق تەكسەرىس ناتيجەسىندە ماتەريالداردىڭ بەرىكتىگى، تەمپەراتۋرالىق توزىمدىلىگى جانە جول توسەمىنە جارامدىلىعى انىقتالادى.
الماتى قالالىق فيليالىنىڭ ينجەنەرى داۋرەن قاجمۇقانوۆتىڭ ايتۋىنشا، مۇنداي باقىلاۋ جۇمىستارى جول ساپاسىن قامتاماسىز ەتۋدە اسا ماڭىزدى ءرول اتقارادى.
«جول قۇرىلىسىنا قولدانىلاتىن ماتەريالداردىڭ ساپاسى تالاپقا ساي بولۋى كەرەك. ەگەر اسفالت قوسپاسى ستاندارتتارعا سايكەس كەلمەسە، جولدىڭ قىزمەت ەتۋ مەرزىمى قىسقارىپ، ءتۇرلى اقاۋلار پايدا بولۋى مۇمكىن. سوندىقتان ءبىز زاۋىتتان الىنعان سىنامالاردى زەرتحانالىق تەكسەرۋدەن وتكىزىپ، ولاردىڭ نورماتيۆتىك تالاپتارعا سايكەستىگىن مۇقيات باقىلايمىز»، – دەدى داۋرەن قاجمۇقانوۆ.
مامانداردىڭ ايتۋىنشا، زەرتحانالىق باقىلاۋ جول قۇرىلىسى كەزىندە ساپاسىز ماتەريالداردى دەر كەزىندە انىقتاۋعا مۇمكىندىك بەرەدى. بۇل ءوز كەزەگىندە جولداردىڭ قاۋىپسىزدىگى مەن ۇزاق مەرزىمدىلىگىن ارتتىرۋعا ىقپال ەتەدى.
