ەلوردادا ازاماتتىق باستامالار ورتالىعىندا قالانىڭ ۇكىمەتتىك ەمەس ۇيىمدارىنىڭ وكىلدەرى باس قوسىپ، مەملەكەت باسشىسى قاسىم-جومارت توقايەۆتىڭ قازاقستان حالقىنا جولداۋىن تالقىلادى.

ءىس-شاراعا ازاماتتىق قوعام وكىلدەرى، سونداي-اق مەملەكەتتىك ورگانداردىڭ قىزمەتكەرلەرى قاتىستى.

نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ پرەزيدەنت جولداۋى قوعامنىڭ ماڭىزدى پروبلەمالارىن شەشۋگە باعىتتالعان ءىس-شارالار كەشەنى ەكەنىن اتاپ ءوتتى.

– ستۋدەنتتەرگە جىلدىق 2-3 پايىزبەن ءبىلىم نەسيەسىن الۋعا مۇمكىندىك بەرىلەدى. بۇرىن مەملەكەت وقۋ ءۇشىن قاراجات بولەتىن. گرانتقا تۇسپەگەن ستۋدەنتتەر اقىلى وقىدى، وقۋىن اياقتاعاننان كەيىن بولاشاق جۇمىسى ەسەبىنەن مەملەكەت الدىنداعى قارىزىن تولەدى. ءقازىر ستۋدەنتتەر ءۇشىن جاعداي ودان دا جاقسى، – دەدى داۋرەن بابامۇراتوۆ.

ونىڭ ايتۋىنشا، پرەزيدەنتتىڭ بالا كۇتىمى بويىنشا تولەم مەرزىمىن 1،5 جاسقا دەيىن ارتتىرۋ، ايەلدەردىڭ زەينەتكەرلىك جاسىن 2028 جىلعا دەيىن 61 جاسقا دەيىن ساقتاۋ جونىندەگى تاپسىرماسى حالىق اراسىندا وڭ شەشىمىن تاپتى. اسىرەسە، بيزنەستى جۇرگىزۋ ءۇشىن 2%-بەن نەسيە بەرىلەتىنى قۋانتادى. بۇل استانالىق جاستار ءۇشىن وتە جاقسى دەمەۋ.

– ءقازىر پرەزيدەنت جولداۋىن تالقىلاعاندا، ونى مەملەكەت دامۋىنىڭ ترەندىنەن كورىپ وتىرمىز. قازىرگى جاستار ەلىمىزدە دەموگرافيالىق جاعداي قارقىن العان 2004-20005 جىلدارى دۇنيەگە كەلگەن. ولار جاقىن ارادا جوعارى وقۋ ورىندارىن ءبىتىرىپ، ەڭبەك نارىعىنا شىعادى. پرەزيدەنت جولداۋدا كەلەسى جىلى جاستار ءۇشىن 100 مىڭ قوسىمشا جۇمىس ورنى پايدا بولاتىنىن مالىمدەدى، – دەدى داۋرەن بابامۇراتوۆ.

«كامەدا» قوعامدىق قورىنىڭ باسشىسى، «قازاقستاننىڭ ازاماتتىق اليانسىنىڭ» رەسمي وكىلى ماحاببات ەسپەنوۆا مەملەكەتپەن بىرلەسىپ قوعامدىق ماڭىزى بار جوبالاردى ىسكە اسىرۋ جونىندە بىرەر مىسال ايتىپ بەردى. اتاپ ايتقاندا، ول ازاماتتىق باستامالار ورتالىعىنىڭ قىزمەتىن جوعارى باعالادى.

– بۇل ازاماتتىق قوعام ينستيتۋتتارى مەن مەملەكەتتە بولىپ جاتقان وقيعالارعا بەي-جاي قارامايتىن بەلسەندىلەر ءۇشىن كوپ سالالى سەرۆيستىك قىزمەت. ەگەر ولار قانداي دا ءبىر پروبلەمانى شەشۋدى جوسپارلاسا، ماقساتىمىز – ولاردى ىسكە اسىرۋعا كومەكتەسۋ. سونىمەن قاتار، بۇل ازاماتتىق قوعام ينستيتۋتتارى مەن مەملەكەتتىك ورگاندار اراسىنداعى ءوزارا ءىس-قيمىلدى قۇرۋ جونىندەگى ديالوگ الاڭى. پرەزيدەنت ءوز جولداۋىندا بيلىك پەن قوعام اراسىنداعى ءتيىمدى ديالوگتىڭ قاجەتتىلىگىن اتاپ ءوتتى. بۇل تۇرعىدا قوعامدىق ۇيىمداردىڭ ءرولى ارتا تۇسۋدە، – دەدى ماحاببات ەسپەنوۆا.