مەملەكەت باسشىسى قاسىم-جومارت توقايەۆ حالىققا ارناعان جاڭا جولداۋىندا ۇلتتىق ەكونوميكانىڭ سالالارىن تەرەڭ وڭدەۋگە كوشۋ باعىتتارىن دامىتۋعا، سۋ جانە كولىك مينيسترلىكتەرى قۇرىلاتىنىن اتاپ كورسەتتى.
پرەزيدەنت جولداۋىندا كوتەرىلگەن ماسەلەلەر تۇراقتى دامۋدىڭ بارلىق 17 باعىتىن قامتىدى.
جولداۋدا نەگىزىنەن قۇرلىقتىڭ ەكوجۇيەلەرىن جانە سۋ رەسۋرستارىن ۇتىمدى پايدالانۋ، كليماتتىڭ وزگەرۋى، ينكليۋزيۆتىك ءوسۋ جانە ەكونوميكالىق وزگەرىستەر، جاھاندىق سەرىكتەستىك، رەسۋرستاردى جۇمىلدىرۋ، تەحنولوگيالار، الەۋەتتى ارتتىرۋ، ساۋدا ماسەلەسىنە باسىمدىق بەرىلدى.
جولداۋدا كورسەتىلگەن جوعارى وقۋ ورىندارىنداعى ءبىلىم ساپاسىن الەمدىك دەڭگەيگە ساي جەتىلدىرۋ قاجەتتىلىگىن ءومىردىڭ ءوزى تالاپ ەتكەنىن ايتا كەلە، پرەزيدەنت ءبىزدىڭ بولاشاق دامۋىمىز ءبىلىم سالاسىندا يننوۆاسيا جەتىستىكتەرىن كەڭىنەن پايدالانۋعا بايلانىستى ەكەنىن باسا ايتتى. اسىرەسە ءبىلىم بەرۋ سالاسىنداعى كوپتەگەن وزگەرىستەر جوعارى وقۋ ورىندارىنداعى كۇردەلى دە شەشىمىن كۇتەتىن عىلىمي ماسەلەلەردى انىقتاپ بەردى. جولداۋدا سونىڭ ورنىن تولىقتىرۋدى ۇسىنا وتىرىپ، دايارلاناتىن مامانداردىڭ وقۋىنا، ۇزدىكسىز ءبىلىم الۋ جانە عىلىم جەتىستىكتەرىن كەڭىنەن ۇلتتىق ەكونوميكاعا ەنگىزۋدىڭ تەتىكتەرىن جەتىلدىرۋدىڭ ماڭىزدىلىعىنا توقتالدى. قازىرگى كەزدە باسقارۋدىڭ زاماناۋي ادىس-تاسىلدەرىن مەڭگەرگەن ماماندارعا دەگەن قاجەتتىلىك كۇننەن-كۇنگە ارتىپ كەلەدى. ءال-فارابي اتىنداعى قازاق ۇلتتىق ۋنيۆەرسيتەتى بۇگىندە قازاقستاندا عانا ەمەس، شەتەلدىك ۋنيۆەرسيتەتتەر قاتارىندا دا باسەكەگە قابىلەتتى ەكەنىن مويىنداتىپ وتىر.
جولداۋدا قويىلعان ناقتى مىندەتتەر قازۇۋ-دا باسەكەگە قابىلەتتى ماماندار دايارلاۋدىڭ جاڭا ءبىلىم بەرۋ باعدارلامالارىن جۇزەگە اسىرۋعا جاڭا مۇمكىندىكتەرگە جول اشپاق.
ءقازىردىڭ وزىندە ۋنيۆەرسيتەتتىڭ مەنەدجمەنت كافەدراسىندا بولون ۇدەرىسىنە سايكەس، الەمدىك سۇرانىس تالاپتارىنا ساي كەلەتىن ءۇش دەڭگەيدە ءبىلىم بەرۋ باعدارلامالارى جۇزەگە اسىرىلىپ كەلەدى. وسى باعدارلامالار ناتيجەسىندە بۇگىنگى تاڭدا ۋنيۆەرسيتەت شەتەلدىڭ جوعارى وقۋ ورىندارىمەن تىعىز بايلانىس ورناتقان جانە دە ءبىلىم بەرۋ باعدارلاماسى ستاندارتىنا ساي، بىلىمگەرلەردىڭ شەتەلدە ءوز ءبىلىمىن شىڭداۋعا مۇمكىندىك بەرىپ وتىر.
ستۋدەنتتەر، ماگيسترانتتار، دوكتورانتتار اقش (ۆاشينگتون)، يتاليا، نيدەرلاندى، پولشا، رەسەي (رۋدن)، چەحيا مەملەكەتتەرىنىڭ ۋنيۆەرسيتەتتەرىندە ءبىلىم الماسۋ بويىنشا اكادەميالىق تاعىلىمدامادان وتۋدە. قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ 2023-2025 جىلدارعا ارنالعان عىلىمي جانە عىلىمي-تەحنيكالىق جوبالارىن گرانتتىق قارجىلاندىرۋ كونكۋرسىندا 75 جوبانى ۋنيۆەرسيتەتىمىز جەڭىپ الدى، سونىڭ ىشىندە مەنەدجمەنت كافەدراسىنىڭ عالىمدارى ءۇش جوبانىڭ اۆتورلارى بولىپ وتىر.
ەكونوميكا جانە بيزنەس جوعارى مەكتەبىندە تەوريالىق جانە قولدانبالى پاندەردى وقىتۋ ۋنيۆەرسيتەتتىك ءبىلىم بەرۋدىڭ اكادەميالىق ءداستۇرلى رۋحىندا جوعارى دەڭگەيدە جۇزەگە اسىرىلۋدا. ۋنيۆەرسيتەت دەڭگەيىندە جوعارى بىلىكتى كادرلاردى دايارلاۋدىڭ ۇزدىك وتاندىق داستۇرىنە سۇيەنە وتىرىپ، فاكۋلتەت مەملەكەتتىك قىزمەت ءۇشىن كادرلار دايارلاۋدىڭ الەمدىك جەتەكشى ورتالىقتارىنىڭ ستاندارتتارىنا سايكەس كەلەتىن ستۋدەنتتەردىڭ قۇزىرەتتىلىكتەرىن قالىپتاستىرۋعا ۇمتىلۋدا.
مەنەدجمەنت كافەدراسىنىڭ پروفەسسور-وقىتۋشىلارى مەملەكەت باسشىسىنىڭ ەل ەكونوميكاسىن جان-جاقتى تالداپ، دامۋدىڭ ستراتەگياسىن كورسەتكەن جولداۋىن قولداي وتىرىپ، ونى ىسكە اسىرۋ باعىتىندا جۇيەلى جۇمىستار اتقارا بەرمەك.
وڭالبەك ابرالييەۆ، مەنەدجمەنت كافەدراسىنىڭ پروفەسسورى، ەكونوميكا عىلىمىنىڭ دوكتورى
