قازاقستاندا مەملەكەت باسشىسىنىڭ ءار جىلعى جولداۋى – ەلدىڭ الداعى دامۋ باعىتىن ايقىندايتىن ستراتەگيالىق قۇجات. بىلتىرعى جولداۋ دا ەكونوميكالىق رەفورمالارعا، حالىقتىڭ ءال-اۋقاتىن كوتەرۋگە جانە الەۋمەتتىك سالاداعى تۇيتكىلدەردى شەشۋگە باسىمدىق بەرگەن ەدى. اراعا ءبىر جىل سالىپ، سول تاپسىرمالاردىڭ قالاي ورىندالعانىنا كوز جۇگىرتسەك. ساياساتتانۋشى قازبەك مايگەلدينوۆ ءبىرقاتار ناقتى ناتيجەلەردى اتادى،- دەپ حابارلايدى Dalanews.kz
ونىڭ ايتۋىنشا، جولداۋداعى نەگىزگى باعىتتار – بيۋدجەتتىك ءتارتىپتى كۇشەيتۋ، سالىق رەفورماسى، ينۆەستيسيا تارتۋ، جەرگىلىكتى بيزنەستى قولداۋ جانە حالىق تابىسىن ارتتىرۋ.
«سوندىقتان وسى باعىتتا بىلتىر ەلىمىزدىڭ ەكونوميكالىق ءوسىمىن تۇراقتاندىرۋعا، سىرتقى ينۆەستيسيا تارتۋعا باستى نازار اۋدارىلدى. ارينە، ينفلياسيا ماسەلەسى وزەكتى بولىپ قالا بەردى. دەگەنمەن، قازاقستاندىق جاھاندىق ينۆەستيسيالىق دوڭگەلەك ۇستەلدە 7 ملرد دوللاردان استام ينۆەستيسيالىق كەلىسىمدەر جاسالدى. بۇل – شەتەلدىك كاپيتالدىڭ ەلىمىزگە سەنىم بىلدىرگەنىن كورسەتەدى»، – دەيدى ساراپشى.
الەۋمەتتىك باستامالار ىسكە قوسىلدى
ساياساتتانۋشى جولداۋدا ايتىلعان الەۋمەتتىك جوبالاردىڭ دا جۇزەگە اسقانىن اتاپ ءوتتى. اتاپ ايتقاندا، بيىلعى جىلدان باستاپ «الەۋمەتتىك ءاميان» پيلوتتىق تۇردە ەنگىزىلىپ، جاردەماقىلاردى سيفرلىق ءاميانعا اۋدارۋ باستالدى.
سونداي-اق، «ۇلتتىق قور – بالالارعا» باعدارلاماسى اياسىندا بۇگىندە 7 ميلليونعا جۋىق بالانىڭ ەسەپشوتىنا قاراجات اۋدارىلعان. ال وتباسىلىق سيفرلىق كارتا جۇيەسى مۇقتاج وتباسىلاردى قولداۋ شارالارىن اناعۇرلىم ءتيىمدى جۇزەگە اسىرۋعا مۇمكىندىك بەرۋدە.
ءبىلىم بەرۋ مەن اۋىلعا قولداۋ
جولداۋداعى باستى باعىتتاردىڭ ءبىرى – ءبىلىم بەرۋ سالاسىن دامىتۋ. «جايلى مەكتەپ» ۇلتتىق جوباسى اياسىندا ەل بويىنشا 200-دەن استام جاڭا ۇلگىدەگى مەكتەپ پايدالانۋعا بەرىلىپ، 500-دەن استام بالاباقشا اشىلدى.
«بۇل وزگەرىستەردىڭ ارقاسىندا ءبىلىم بەرۋ جۇيەسىندە ناقتى ناتيجەلەرگە قول جەتكىزىلدى. سونىمەن قاتار، اۋىل شارۋاشىلىعىندا «اۋىل اماناتى» جوباسى جۇزەگە اسىرىلىپ، اۋىلدىق وكرۋگتەردەگى شاعىن نەسيە بەرۋ شارالارى كوپتەگەن وتباسىلارعا قوسىمشا تابىس كوزىنە اينالدى»، – دەيدى قازبەك مايگەلدينوۆ.
ءالى دە شەشىمىن كۇتكەن ماسەلەلەر بار
ساراپشى كەيبىر تۇيتكىلدى ماسەلەلەردىڭ ءالى تولىق شەشىلمەگەنىن دە جاسىرمادى. ونىڭ ىشىندە جەر قاتىناستارى، سۋ رەسۋرستارىن ءتيىمدى پايدالانۋ، تاريف ساياساتىن جاڭارتۋ قاجەتتىگى بار.
«ءار سالادا قيىندىقتار بولادى. جەردى زاڭسىز قايتارىپ الۋ كوميسسياسى قۇرىلعانىمەن، بۇل باعىتتاعى ماسەلە تولىق شەشىلگەن جوق. سۋ رەسۋرستارىن پايدالانۋ، اسىرەسە تاريفتەردى جاڭارتۋ – كۇن تارتىبىندە تۇرعان ماڭىزدى باعىت»، – دەپ اتاپ ءوتتى ساياساتتانۋشى.
الداعى جولداۋدان نە كۇتەمىز؟
قازبەك مايگەلدينوۆتىڭ ويىنشا، بيىلعى جولداۋدا الەۋمەتتىك سالاعا، اسىرەسە حالىقتىڭ تابىسىن ارتتىرۋعا ەرەكشە كوڭىل ءبولىنۋى ءتيىس.
«الداعى جولداۋدا باعانى تۇراقتاندىرۋ، ينفلياسيانى اۋىزدىقتاۋ جانە الەۋمەتتىك كومەككە نازار اۋدارىلۋى كەرەك. زەينەتاقى مەن جالاقىنى ارتتىرۋ ماسەلەسى ءبىرىنشى كەزەكتە تۇرعانى ءجون»، – دەدى ول.
