ALT University وقۋ ورنىندا تۇلەكتەرگە ديپلوم تاپسىرۋ سالتاناتى ءوتتى. سالتاناتتى جيىنعا جول اكتيۆتەرى ساپاسىنىڭ ۇلتتىق ورتالىعى الماتى قالالىق فيليالىنىڭ ديرەكتورى ماۋلەن ءالىپوۆ قاتىستى، دەپ حابارلايدى Dalanews.kz
ءىس-شارا بارىسىندا ول جاس مامانداردى وقۋىن ءساتتى اياقتاۋىمەن قۇتتىقتاپ، جول-قۇرىلىس سالاسىنىڭ ستراتەگيالىق ماڭىزىنا توقتالدى. ونىڭ ايتۋىنشا، ساپالى جول – تەك ينفراقۇرىلىم نىسانى ەمەس، ول ەل ەكونوميكاسىنىڭ دامۋى مەن ازاماتتاردىڭ قاۋىپسىزدىگىنە تىكەلەي اسەر ەتەتىن ماڭىزدى فاكتور.
«جول سالاسى – جوعارى جاۋاپكەرشىلىكتى تالاپ ەتەتىن باعىت. ءاربىر جوبا ساپا مەن قاۋىپسىزدىك تالاپتارىنا تولىق ساي بولۋى ءتيىس. سوندىقتان كاسىبي بىلىكتىلىكتى ۇزدىكسىز ارتتىرۋ – ۋاقىت تالابى»، – دەدى ول.
فيليال ديرەكتورى بۇگىنگى تۇلەكتەردىڭ باسەكەگە قابىلەتتىلىگى مەن زاماناۋي ءبىلىمىنىڭ ەل ينفراقۇرىلىمىن جاڭعىرتۋدا شەشۋشى ءرول اتقاراتىنىن اتاپ ءوتتى.
بۇگىنگى جاس ماماندار – ەرتەڭگى جول سالاسىنىڭ تىرەگى. ولاردىڭ كاسىبي ۇستانىمى مەن ادالدىعى قازاقستانداعى جول ساپاسىنىڭ جاڭا دەڭگەيگە كوتەرىلۋىنە نەگىز بولماق.
