وڭىرلەردى بايلانىستىراتىن كۇرە جولدىڭ دا، اۋىل-اۋىلعا قاتىنايتىن قارا جولدىڭ دا جانعا جايلى بولعانى قانداي جاقسى. «جول ازابىن جۇرگەن بىلەدى» دەگەندەي، شۋ اۋدانىنداعى شەشىمىن كۇت­كەن كۇردەلى ماسەلەلەردىڭ بىرەگەيى اۆتو­كولىك جولدا­رىنىڭ جايى بولاتىن.

جاۋىندى-شاشىن­دى كۇندەرى، كوكتەم مەن كۇز مەزگىلىندە جۇرگىن­شىلەر لاي-باتپاققا باتىپ، ابدەن اۋرە-سارساڭعا سالىنسا، جاز ايلارىندا ساپاسى سىن كوتەرمەيتىن جولدان شىعاتىن شاڭنان قۇددى ءبىر تۇماننىڭ اراسىندا جۇرگەندەي كۇي كەشۋشى ەدى. بۇندايدا كولىك تىزگىنىن ۇستاعان ءجۇر­گىزۋشىلەردىڭ شەگەتىن ازابىمەن قوسا، تەمىر تۇلپارلارىنىڭ دا سۇرقى قاشاتىن. جۇرگىزۋشىلەر دىتتەگەن جەرىنە زورعا جەتكەنىمەن، تەمىر تۇلپارىنىڭ قوسالقى بولشەكتەرى سىر بەرىپ،  جوندەۋدەن وتكىزۋگە تۋرا كەلەتىنىن ءجيى ەستىپ كەلدىك. بۇل قالتاعا سالماق سالىپ، جۇيكەگە شي جۇگىرتكەندەي اسەر ەتەرى دە جاسىرىن ەمەس. ال، ەلدى مەكەندەردى بىر-بىرىمەن بايلانىستىرىپ، قىج-قىج قايناعان تىنىمسىز تىرشىلىككە وشپەس ءنار بەرىپ جاتقان كۇرە جولداردىڭ قادىر-قاسيەتىن ونىڭ بەينەتىن تارتىپ جۇرگەن تۇرعىنداردان ارتىق ەشكىم بىلە قويماس. ونىڭ ۇستىنە جولدىڭ ساپاسى ادام توزگىسىز بولسا، شوقىراق اتتىڭ ۇستىندە كەلە جاتقانداي جايسىز كۇي كەشەرىڭىز ايتپاسا دا بەلگىلى. كەدىر-بۇدىرى مول ساپاسىز جولدار كوڭىلگە قاياۋ اكەلەتىن. اسىرەسە، اۋداننىڭ ىشىندەگى ويدىم جولدىڭ سالدارىنان جولاۋشىلاردىڭ زارداپ شەگەتىنى ەشكىمگە قۇپيا ەمەس. وسىعان دەيىن شۋلىقتاردىڭ جانايقايىنا اينالعان، جوندەۋ كورمەگەنىنە 10 جىلعا جۋىقتاعان وسىناۋ جول ماسەلەسى قانشاما ماقالاعا ارقاۋ بولىپ، ءدال وسى جولدىڭ اينالاسىندا ايتىلار اڭگىمە دە از بولمادى. وسىعان قاراپ-اق، جول شىن مانىندە ءومىردىڭ وزەگى، باقۋات­تى تىرلىكتىڭ قاينار كوزى ەكەنىن اڭعارۋعا بولادى. وركەنيەتتى ەلدەردىڭ بارىس-كەلىس پەن الىس-بەرىستە جول قاتى­نا­سىنا ايرىقشا نازار اۋداراتىنى دا سوندىقتان.

ال، بۇگىندە كوپشىلىكتىڭ قابىرعاسىنا ايازداي باتقان شۋداعى وسى ءبىر تۇيتكىلدىڭ ءتۇيىنى بىرتىندەپ شەشىلە باستاعان سىڭايلى. جولداردى قالپىنا كەلتىرۋ جانە ونى كۇردەلى جوندەۋدەن وتكىزۋ اسا وزەكتى ماسەلە. شۇعىل تۇردە جوندەۋدى تالاپ ەتىپ كەلگەن اۋدان جولدارىنىڭ جاعدايى بۇگىنگى كۇنى ەداۋىر جاقسارىپ قالعان. ءقازىر شۋداعى تاقتايداي تەپ-تەگىس جولدار بارار جەرىڭە تەز جەتكىزىپ، ەشقانداي اۋرە-سارساڭعا سالمايدى. شۋ وڭىرىندە كۇرمەۋى كەلىسپەگەن وسىناۋ وزەكتى ماسەلەنى شەشۋ ءۇشىن وسىدان ەكى جىل بۇرىن قارقىندى جۇمىستار باستالىپ كەتكەن بولاتىن. سونىڭ ىشىندە، ءبىز مىسالعا كەلتىرگەن اۋداننىڭ ىشكى جولدارىن جوندەۋ جۇمىستارى كولعا الىندى. بۇعان قوسا، 2017 جىلى اۋدانعا اكىم بولىپ سايلانعان قايرات دوسايەۆ بۇل جۇمىستاردى ءوزىنىڭ ەرەكشە باقىلاۋىندا ۇستاپ وتىر. وسىلايشا، بۇعان دەيىن كوپشىلىكتىڭ ورىندى رەنىشىن تۋىنداتقان ماسەلە رەتكە كەلە باستادى. قايرات اسكەربەك ۇلى اكىم بولعالى اۋداندىق ماندەگى تولە بي اۋىلىنىڭ كىرە بەرىس اۆتوموبيل جولىنىڭ 2،19 شاقىرىمىنا، اباي اۋىلىنا كىرە بەرىس جولدىڭ 8،68 شاقىرىمىنا، شۋ قالاسىنداعى تەمىر جول بەكەتىنىڭ اۆتوتۇراق الاڭىنا جانە قالاداعى ساتپايەۆ، س.شاكىروۆ، ناۋالييەۆ كوشەلەرىنە جوندەۋ جۇمىستارى جۇرگىزىلدى. وسىنداي يگىلىكتى ءىس اۋدانعا قاراستى اۋىلداردا دا جالعاسىن تاپتى. ماسەلەن، بىرلىك اۋىلىنداعى پانفيلوۆ كوشەسىنىڭ 2،320 شاقىرىمىنا ورتاشا جوندەۋ جۇمىستارى جۇرگىزىلسە، اۋدان ورتالىعى تولە بي اۋىلىنداعى تولە بي كوشەسىنىڭ 1،2 شاقىرىمىنا، مويىنقۇم اۋىلىنداعى شاكىروۆ كوشەسىنىڭ 0،8 شاقىرىمىنا، دالاقاينار اۋىلىنداعى تولە بي كوشەسىنىڭ 0،8 شاقىرىمىنا، العا اۋىلىنداعى شىمىرقۇل كوشەسىنىڭ 0،63 شاقىرىمىنا، ساۋىتبەك اۋىلىنداعى قىدىرباي كوشەسىنىڭ 0،5 شاقىرىمىنا ورتاشا جوندەۋ جۇمىستارى جۇرگىزىلىپ، اۋىلداردىڭ كوركى اجارلانا تۇسكەن.