اۋىل شارۋاشىلىعى مينيسترلىگى جەلىدە ترەندكە اينالعان "شاين مۋسكات" جۇزىمىندە اعزاعا زياندى زيانكەس تابىلماعانىن مالىمدەدى، - دەپ حابارلايدى Dalanews.kz.
اۋىل شارۋاشىلىعى ءمينيسترىنىڭ تاپسىرماسى بويىنشا قازاقستان رەسپۋبليكاسى اۋىل شارۋاشىلىعى مينيسترلىگى اوك-تەگى مەملەكەتتىك ينسپەكسيا كوميتەتىنىڭ رەسپۋبليكالىق وسىمدىكتەر كارانتينى ورتالىعىنىڭ قىزمەتكەرلەرى كارانتيندىك فيتوسانيتاريالىق باقىلاۋ كەزىندە ءجۇزىم ۇلگىلەرىنە زەرتحانالىق ساراپتاما جۇرگىزدى.
كارانتيندىك فيتوسانيتارلىق قورىتىندىعا سايكەس كارانتيندىك زيانكەستەر تابىلعان جوق.
سونداي-اق، قازاقستان رەسپۋبليكاسى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ "ۇلتتىق ساراپتاما ورتالىعى" رمك-نىڭ اباي اۋدانى بويىنشا فيليالى (جۇڭگو حالىق رەسپۋبليكاسىمەن شەكارادا) "Shine Muscat" نيتراتىنىڭ قۇرامى بويىنشا زەرتتەۋ جۇرگىزىلدى، ونىڭ قورىتىندىسى بويىنشا ونىمدەگى نيترات مولشەرى 13،7 مگ/كگ قۇرادى، بۇل وسى ءونىم ءۇشىن رۇقسات ەتىلگەن كورسەتكىش.
ەستەرىڭىزگە سالا كەتەيىك، وسىمدىكتەر كارانتينىنىڭ نەگىزگى ماقساتتارى:
- قازاقستان رەسپۋبليكاسىنىڭ اۋماعىن باسقا مەملەكەتتەردەن نەمەسە كارانتيندىك وبەكتىلەردىڭ كارانتيندىك ايماعىنان كىرۋدەن نەمەسە دەربەس ەنۋدەن قورعاۋ؛
- كارانتيندىك وبەكتىلەردى انىقتاۋ، وقشاۋلاۋ جانە جويۋ، سونداي-اق ولاردىڭ قازاقستان رەسپۋبليكاسىنىڭ باسقا وڭىرلەرىنە ەنۋىنە جول بەرمەۋ؛
- قازاقستان رەسپۋبليكاسىنىڭ وسىمدىكتەر كارانتينى سالاسىنداعى زاڭناماسىنىڭ ساقتالۋىنا مەملەكەتتىك كارانتيندىك فيتوسانيتاريالىق باقىلاۋدى جانە قاداعالاۋدى جۇزەگە اسىرۋ.
ەسكە سالايىق،دەپۋتات مۇقايەۆ جۇرت جاپپاي قىمبات ءجۇزىم ساتىپ الىپ جاتقانىن سىناعان بولاتىن.
دەپۋتات مۇنى كورسەقىزارلىق نەمەسە ماركەتينگ قۇربانى بولۋ دەپ باعالادى.
"دۋباي شوكولادى" دەگەن شىعىپ ەدى، ەندى "كارىس ءجۇزىمى" (شەين مۋسكات دەي مە) دەگەن شىقتى. ينستاعا كىرىپ قالساڭ بولدى، شىرت-پىرت دەپ جەپ وتىرعاندار قاتارى كوبەيدى. سونى جالپاق جۇرتقا جاريالاماي-اق جەۋگە بولادى عوي... كىشكەنتاي دۋباي شوكولادىنىڭ باعاسى 15-20 مىڭ تەڭگە بولىپ ەدى، ەندى مىنا ءجۇزىمنىڭ كىشكەنە ءبىر بولىگى 5-10 مىڭ تەڭگە دەسەدى. "اقشا جوق-جوق" دەيدى دە، تالاپ الىپ جاتىر حالىق. ونىڭ قۇرامىندا نە بار، نەسى پايدالى، نە زيان، ول تۋرالى باسىمىزدى اۋىرتقىمىز كەلمەيدى. باستىسى جۇرتتان قالماۋ كەرەك. اللا بىلەدى، بۇنى دا 12/24 ايعا ءبولىپ تولەيتىندەر شىقسا تاڭ قالمايمىن.
اقشاڭىز ارتىلىپ جاتسا، الا بەرىڭىز. قارسىلىعىم جوق. ءبىراق ەلدەن، ترەندتەن قالمايىن دەگەن وي - ابەستىك. ودان دا مىنا قوڭىر كۇزدە ەت جەڭىزدەر، سورپا ىشىڭىزدەر. مىنە، ناعىز پايدالى تاعام"، - دەدى ول.
ايتا كەتەيىك، بۇعان دەيىن DALA INSIDE دۋبايداعى شوكولاد فابريكالارى تولىق قۋاتتا جۇمىس ىستەپ جاتقانىنا، ال ولاردىڭ ءونىمىن قازاقتار تالاپ اكەتىپ جاتقانى جونىندە زەرتتەۋ جاريالاعان ەدى.
"دۋبايدان جەتكىزىلەتىن اتىشۋلى شوكولادتىڭ باعاسى 20 مىڭ تەڭگەگە جەتىپ وتىر، ال ونىڭ شىنايى قۇندىلىعى بۇل سومانىڭ جارتىسىنا دا تاتىمايدى.
وسىناۋ قۇبىلىس حالىقتىڭ تۇتىنۋ مادەنيەتىن عانا ەمەس، سونىمەن بىرگە ەلدىڭ قارجىلىق ساۋاتتىلىعى قانداي دەڭگەيدە ەكەنىن كورسەتەدى. شوكولادقا جۇمسالعان 20 مىڭ تەڭگە، ءبىر عانا تۇتىنۋشى تۇرعىسىنان ەلەۋلى بولماۋى مۇمكىن. ءبىراق، مۇنداي ترانزاكسيانىڭ سانى ەسەلەنگەن سايىن، بۇل ميلليونداعان تەڭگەنىڭ شەتەلگە اعۋىنا الىپ كەلەدى. شەتەلدىك تاۋارعا تاۋەلدىلىك ۇلتتىق كاپيتالدىڭ ىشكى نارىقتا تۇراقتاۋىنا كەدەرگى جاسايدى"، - دەپ توپشىلاعان ەدى ارنا.
