جەتىسۋداعى بۇل اۋقىمدى شارانى جاستاردىڭ شىعارماشىلىق الەۋەتىن ارتتىرىپ، تالانت كوزىن اشۋ ماقساتىندا وبلىستىق جاستار ساياساتى جونىندەگى باسقارما مەن جاستار رەسۋرستار ورتالىعى بىرلەسىپ ۇيىمداستىردى. فەستيۆالدى وبلىس اكىمى ا. باتالوۆ تا تاماشالادى.
قاراتال جاعالاۋىنا كىرەبەرىستە كەلۋشىلەردى وركەستر قارسى الدى. قالالار مەن اۋدانداردان جينالعان 100 دومبىراشى بەلگىلى قازاق كۇيشىلەرىنىڭ كۇيلەرىن ورىندادى. سونداي-اق مەرەكە اياسىندا پوەزيا كەشى ۇيىمداستىرىلىپ، Newzhetisy كونكۋرسىنىڭ ۇزدىك فوتوسۋرەتتەرى، روبوتوتەحنيكا كورمەلەرى مەن اعاش ويۋ ونەرىنىڭ ۇزدىك ۇلگىلەرى ۇسىنىلدى.
قالالىقتار مەن قالا قوناقتارى قولونەرشىلەردىڭ Jetisy: Hand made ساۋدا كورمەسىنەن قالاعان بۇيىمدارىن ساتىپ الۋعا مۇمكىندىك الدى.
Jetisy Style جاستار فەستيۆالىنىڭ اياسىندا ىلمەكپەن توقىما توقۋ ءىسىنىڭ شەبەرى نۇرلان جارتىبەكوۆ توقىمادان الەمدىك رەكورد ورناتا الدى. ول قاپشاعاي قالاسىنداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىندا توقىما ساباعىنان ءتالىم بەرەدى.
نۇرلان ءوزىنىڭ العاشقى رەكوردىن بيىلعى جىلدىڭ باسىندا جاسادى. ول كوزىن جۇمىپ تۇرىپ ءبىر مينۋتتا 56 ىلمەكتى بايلانىستىرىپ ۇلگەرگەن. نۇرلان جاستارعا قىزمەت كورسەتۋ ورتالىعىندا توقىماعا كىرىسىپ، 72 ساعاتتىڭ ىشىندە دەمالماستان، ۇيىقتاماستان 35 مەتر ءجۇن شارف توقىدى. بۇل – توقىمادان الەم تاريحىنداعى جاڭا رەكورد. رەكوردشى نۇرلان جارتىبەكوۆتى وبلىس اكىمى ا. باتالوۆ ديپلوممەن جانە Jetisy Style جاستار فەستيۆالى اتاۋى جازىلعان ارنايى ستاتۋەتكامەن ماراپاتتادى.
سپورتتىق جارىستاردىڭ دا كورىگى قىزدى: كوشە گيمناستتارى Street Workout الاڭىندا كورەرمەندەرگە ءوز شەبەرلىكتەرىن كورسەتسە، سكەيتتەر مەن روليكتەردى جاقسى كورەتىندەر ءۇشىن ارنايى الاڭداردا جارىستار ۇيىمداستىرىلدى. سونىمەن قاتار فەستيۆال قاتىسۋشىلارى مەن قوناقتارى كيبەرسپورت ارەناسىندا ءوز ونەرلەرىن كورسەتۋگە مۇمكىندىك الدى. جالپى فەستيۆالدى ۇيىمداستىرۋشىلار جاعالاۋدىڭ ءاربىر شارشى مەتر الاڭىن ءتيىمدى پايدالانۋدى تولىقتاي ويلاستىرعان.
قاراتال جاعالاۋىندا 12 قاناتتى كيىز ءۇي تىگىلدى. كيىز ءۇي جابدىقتارى
م. تىنىشبايەۆ اتىنداعى ولكەتانۋ مۋزەيى جادىگەرلەرىنىڭ ارقاسىندا قازاق مادەنيەتىن تولىقتاي كورسەتە الدى. ينتەرەرلەر سيمۆوليكالىق جانە تاريحي ماڭىزدا ۇسىنىلدى. كيىز ۇيدە فەستيۆال قوناقتارى مەن قاتىسۋشىلارىن ارنايى گيد كۇتىپ الدى. مۇندا قوناقتار قىمىز، شۇبات جانە باسقا دا ءسۇت تاعامدارىنىڭ ءدامىن تاتىپ كوردى. ەتنواۋىل اۋماعىندا جاستار ءۇشىن التىباقان ورناتىلدى. كەلۋشىلەر اڭعا سالاتىن قىران بۇركىتتەر مەن جۇيرىك يتتەردى دە تاماشالادى. قىسقاشا ايتقاندا، فەستيۆالگە كەلگەندەر قازاقتىڭ ەتنيكالىق ەرەكشەلىگىن سەزىنىپ، بابالار ءداستۇرىن ساناسىندا تاعى ءبىر جاڭعىرتتى.
فەستيۆال اياسىندا كوڭىل كوتەرۋ شارالارى دا قاراستىرىلدى. جاستار كاراوكەمەن ءان سالىپ، اربۋز party شاراسىنا قاتىستى، بالالار «ارماندار تاقتاسىنا» ارماندارىن جازىپ، اسفالتقا سۋرەت سالدى.
شارادا ون شاقتى انيماتور مەن ءتورت كوسپلەي بالالاردىڭ كوڭىلىن كوتەردى. ودان بولەك جاعالاۋدا ءسىبىردىڭ التىن سيركىنەن كەلگەن ارتىستەردىڭ ويىنى قاباتتاسا ءجۇرىپ جاتتى. شوۋ باعدارلامادا ارا توتىقۇسى، حورەك- ەكستريمال، وزەن مايمىلى، يتتەر، اۋە گيمناستتارى، سايقىمازاقتار جانە ت.ب. ءوز ونەرلەرىن پاش ەتتى.
شارا جاستار اراسىندا حيت-انگە اينالعان «سامايا ۆىشكا» ءانىن ورىنداۋشىلار Raim&Artur دۋەتى جانە باسقا دا ونەرپازدار قاتىسقان كونسەرتپەن جالعاسىپ، وتشاشۋمەن تۇيىندەلدى.
