ول 3 مىڭ شاقىرىمدى 34 كۇندە ءجۇرىپ وتكەن. كەشە كەشكىلىك سپورتشىنى تۋىستارى، جەرلەستەرى، سپورتتاعى ارىپتەستەرى قۋانىشپەن قارسى الدى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
المات بالتابەكوۆ نۇر-سۇلتان قالاسىنان باستاپ، قورعالجىن، ۇلىتاۋ، قىزىلوردا، تۇركىستان، شىمكەنت، جەتىساي، تاراز، الماتى، تالدىقورعان قالالارى مەن ەلدى مەكەندەرى ارقىلى 3000 شاقىرىمدى 34 كۇندە ءجۇرىپ وتكەن.
المات بالتابەكوۆتىڭ ايتۋىنشا، ول بۇرىن جول توسىپ ساياحاتتاۋمەن اۋەستەنگەن. كەيىن ىشكى ءتۋريزمدى دامىتۋعا جانە سپورتتى ناسيحاتتاۋعا باعىتتالعان وسىنداي پاتريوتتىق ۆەلوتۋرعى شىعۋ تۋرالى وي كەلگەن.
– ەلىمىزدىڭ وڭىرلەرىن ارالاعان كەزدە جەرگىلىكتى تۇرعىندارمەن ارالاسۋعا، تابيعات تاماشالارىن كورىپ ۇلگەرۋگە تىرىستىم. ەل تاۋەلسىزدىگىنىڭ وتىز جىلىنداعى جەتىستىكتەرىنە كۋا بولدىم. العان اسەرىممەن "ينستاگرام" پاراقشاسىندا ءبولىسىپ وتىردىم. مەنى حالقىمىزدىڭ قوناقجايلىعى ءتانتى ەتتى. قاي جەرگە بارسام دا، بەيتانىس ادامدار مەنى قۇرمەتتى قوناعىنداي قارسى الدى، – دەدى ا.بالتابەكوۆ. استانالىق جاستاردىڭ اتىنان الماتى وبلىسىنىڭ جاستار ساياساتى ماسەلەلەرى جونىندەگى باسقارمانىڭ جاستارىنا سيمۆوليكالىق ستاتۋەتكانى سىيعا تارتىپ، كورسەتكەن قولداۋى ءۇشىن باسقارماعا ريزاشىلىعىن جەتكىزدى.
وبلىستىق جاستار ساياساتى ماسەلەلەرى باسقارماسىنىڭ مالىمەتىنشە، ساپاردىڭ نەگىزگى ماقساتى – سالاۋاتتى ءومىر سالتىن ناسيحاتتاۋ، ىشكى تۋريزم مەن سپورتتى دامىتۋ. قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ قارساڭىندا وسىنداي پاتريوتتىق اكسيالاردى قولداۋ ۇرپاق تاربيەسىنە قوسىلعان سۇبەلى ۇلەس بولماق.
اتاپ وتسەك، المات بالتابەكوۆ ءى.جانسۇگىروۆ اتىنداعى جەتىسۋ ۋنيۆەرسيتەتىن «پسيحولوگيا» ماماندىعى بويىنشا اياقتاعان. تالدىقورعان قالاسىنداعى جاستارعا قىزمەت كورسەتۋ ورتالىعىندا ستۋدەنتتىك تاجىريبەدەن وتكەن. ءقازىر نۇر-سۇلتان قالاسىنداعى پسيحيكالىق دەنساۋلىق ورتالىعىندا جۇمىس ىستەيدى.
