استانا قالاسىنداعى «قازانات» يپپودرومىندا الماتى وبلىسىنىڭ ۇلتتىق سپورت تۇرلەرىنەن كورسەتىلىمى باستالدى. شارا «استانا ەكسپو-2017» حالىقارالىق مامانداندىرىلعان كورمەسىنە وراي الماتى وبلىسىنىڭ مادەنيەت كۇندەرى اياسىندا وتۋدە.
كورسەتىلىمدە تەڭگە ءىلۋ، اۋدارىسپاق، جامبى اتۋ، تازى يتتەر جارىسى سياقتى ۇلتتىق سپورت تۇرلەرىنەن شەبەرلىك ويىندارى ۇسىنىلۋدا. سول سياقتى يپپودروم اۋماعىنداعى ەتنواۋىلدا اسىق اتۋ، توعىزقۇمالاق، قازاق كۇرەسىنەن «تۇيەپالۋاندار جارىسى» قىزدى.
كورەرمەندەر جەتىسۋلىق بۇركىتشىلەردىڭ بۇركىتتى قولعا شاقىرۋ ونەرىن دە تاماشالاۋدا.
الماتى وبلىستىق دەنە شىنىقتىرۋ جانە سپورت باسقارماسىنىڭ ءبولىم باسشىسى المات ۇشكەمپىروۆتىڭ ايتۋىنشا، جالپى ۇلتتىق ويىنداردى استانالىقتار مەن ەلوردا قوناقتارىنىڭ نازارىنا ۇسىنۋعا وڭىردەن 50-گە تارتا سپورتشى كەلگەن. ولاردىڭ اراسىندا قازاقستان رەسپۋبليكاسىنىڭ سپورت شەبەرلەرى مەيىرجان ءماتجان، ەلدوس تىلەبالدييەۆ، ەلدار جيەنقۇلوۆ، زاكيرجان جيەنقۇلوۆ جانە وزگە دە سپورتشىلار بار. توعىزقۇمالاقتان استانا جانە جەتىسۋلىق كوماندالار اراسىندا جولداستىق ويىندار وتەدى دەپ جوسپارلانۋدا.
– «استانا ەكسپو – 2017» كورمەسىنىڭ قوناعى ۇلىبريتانيالىق فرەدەريك اۆگۋستين باۋمايستەر ۇلتتىق سپورت ويىندارى ءۇشىن يپپودرومعا ارنايى كەلگەن. «بۇل قازاقستانعا العاش كەلۋىم. استانانى كورىپ، قازاق مادەنيەتىنەن، ونەرىنەن حاباردار بولدىق. بۇگىن مەن ءۇشىن ۇلتتىق سپورت تۇرلەرى، سونىڭ ىشىندە بۇركىتتى، ارنايى يتتەردى سپورتتىق جارىستارعا قوسۋدى كورۋ اسا قىزىقتى بولدى. وتە جاقسى اسەر الدىم، – دەيدى ف. باۋمايستەر.
ايتا كەتۋ كەرەك، يپپودرومداعى سپورتتىق شارالار ەكى كۇن بويى جالعاسادى.
الماتى وبلىسى اكىمىنىڭ باسپا ءسوز قىزمەتى
