ەرجۇرەكتىك پەن ەرلىك، باتىرلىق پەن قايسارلىق تەك سوعىس ساعاتىندا عانا سومدالمايدى. كۇندەلىكتى ءومىردىڭ كەز كەلگەن سىن ساتتەرىندە باسىن قاتەرگە تىگىپ، ەرلىك كورسەتكەن جاندار وسى قاسيەتتەرى ارقىلى تالاي جۇرەكتەرگە وت تاستاپ، نامىسىن نايزاعايداي ويناتادى، رۋحتى وياتادى.

جەتىسۋ جەرىندە باتىر ازاماتتارىمىز جەتەرلىك. الايدا ەسىمدەرى ەلگە تانىمال بولماي، ۇمىت قالعاندارى قانشاما. سول ەسىمدەردى جاڭعىرتۋ، تانىمال ەتۋ، ەرلىكتەرىن ءبىلۋ ماقساتىندا «جەتىسۋدىڭ جەتى باتىرى» اتتى جوباسى باستاۋ الىپ، العاشقى جەتى باتىرى دا بەلگىلى بولدى.

جاڭا جوبا بەلگىلى جۋرناليست، بلوگەر ساندۋعاش دۇيسەنوۆانىڭ يدەياسى. بۇگىندە ول «پياتىي رەگيون» اتتى قوعامدىق بىرلەستىك قۇرىپ، قايىرلى ىستەردى ناسيحاتتاۋعا دەن قويعان.

– بۇل كۇندە قايسارلىق تانىتاتىن ازاماتتار كەمدە-كەم. ءبىراق، كوپكە توپىراق شاشۋعا دا بولمايدى. ءوز ءومىرىن ويلانباستان باسقا ازامات ءۇشىن قيىپ، قول ۇشىن سوزاتىندار دا جەتەرلىك. ءتىپتى، ومىردەن وزعانداردا قانشاما. سونداي يگى ىستەردى اتقارعان ازاماتتارىمىزدىڭ ەرەن ەڭبەكتەرىن جاڭعىرتۋ ماقساتىندا  الماتى وبلىسىنىڭ ىشكى ساياسات باسقارماسىنىڭ قولداۋىمەن بايقاۋ ۇيىمداستىردىق، – دەيدى جوبا اۆتورى.

جالپى بايقاۋعا 7 نوميناسيا بويىنشا، 30-دان استام ازاماتتاردىڭ وتىنىشتەرى  قابىلدانعان. 7 ۇمىتكەر الەۋمەتتىك جەلى ارقىلى جينالعان داۋىس ارقىلى انىقتالدى.

بايقاۋدىڭ العاشقى «جانعان جۇلدىز» نوميناسياسىن 2012 جىلى قاپشاعاي سۋ قويماسىنىڭ جانىندا شومىلىپ جۇرگەن بەيتانىس بالانى قۇتقارىپ، ءوز ءومىرىن قۇربان ەتكەن ولجاس قۇلجابەكوۆتىڭ اتا-اناسىنا تابىستادى.

– بيىل بالامىزدىڭ ارامىزدا جوقتىعىنا 11 جىل تولىپ وتىر. وسى ۋاقىت ىشىندە ولجاسىمىزدىڭ ەرلىگىن ءاردايىم ۇمىتپاي، ءارتۇرلى ءىس-شارالاردا ەسكەرىپ، ماراپاتتاپ جاتادى. ءبىر شەتىنەن اتا-انا رەتىندە بىزگە قۋانىش، ءبىر جاعىنان بالامىزدىڭ ورتامىزدا جوق بولعانى ۇلكەن قايعى.ۇلىمىزدى جوقتاتپاي ماراپاتتاپ جاتقان ۇيىمداستىرۋشىلارعا العىسىمىزدى بىلدىرەمىز، – دەدى ولجاس قۇلجابەكوۆتىڭ اكەسى سەرىك قۇلجابەكوۆ.

ەرلىك بىلەكتە ەمەس – جۇرەكتە. ماراپاتتالعان 6 ۇمىتكەردە ءوز ورتالارىندا كەڭىنەن تانىمال، ولار: «ەرلىگى ءۇشىن» قالييەۆ قانات، «حالىق باتىرى» دوسىمبەكوۆ كاديرحان، «ەر جۇرەك» نوميناسياسى ابدييەۆ ەلدار، «كەيىپكەر» اتالىمى ارمان باحىتباي ۇلى، «قاھارمان قىز» نوميناسياسى سيتاسمانوۆا كاميللا، «جۇرەكتەن جۇرەككە» نوميناسياسى ۆولونتەرسكوە دۆيجەنيە  "LIDER.KZ" سياقتى باتىرلارعا بۇيىرىپ، باعالى سىيلىقتارمەن ماراپاتتالدى.

ايتا كەتۋ كەرەك، بۇل بايقاۋ ءوز جالعاسىن تاباتىن بولادى. جەتىسۋدىڭ جەتى باتىرى حەشتەگىمەن ەرلىگىن ەلگە ناسيحاتتاۋعا تۇرارلىق ەسىمدەر تۋرالى حابارلامالار جاريالاۋلارىڭىزعا بولادى.

 

بالجان جۇمانبەكوۆا، الماتى وبلىسى