رەسپۋبليكالىق «تازا قازاقستان» ەكولوگيالىق اكسياسى اياسىندا تالدىقورعان قالاسى ماڭىنداعى ستيحيالىق قوقىس ورىندارى تازارتىلدى.
ەلىمىزدە ستيحيالىق قوقىس ورىندارى مەن كولەمى سپۋتنيكتىڭ كومەگىمەن، اەرو ءتۇسىرىلىم ارقىلى انىقتالعان بولاتىن. قازىرگى تاڭدا سول ورىنداردى تازارتۋ جۇمىستارىمەن اينالىسۋدا. جالپى، ستيحيالىق قوقىس ورىندارىن تازالاۋ جۇمىستارى مەردىگەر مەكەمەلەردىڭ كۇشىمەن جىل بويى اتقارىلماق.
تالدىقورعان قالاسى بويىنشا اتالعان جۇمىستاردى «جاكسىمبەت» ج ش س جۇزەگە اسىرادى. جىل باسىنان بەرى وبلىس ورتالىعىندا 12 ورىن انىقتالىپ، 273 م3 قوقىستان تازارتىلدى. بۇگىنگى كۇنگە 2 ستيحيالىق قوقىس ورنىندا تازالىق جۇمىستارى جۇرگىزىلىپ، 35 م3 قوقىس شىعارىلدى.
سونىمەن قاتار، قالانىڭ 100 جۋىق ەرىكتىلەرى، ستۋدەنتتەر مەن «جەتىسۋ جاستارى» ورتالىعىنىڭ قىزمەتكەرلەرى قالا كوشەلەرىن تۇرمىستىق قوقىس پەن بوس بوتەلكەلەردەن تازارتتى. تازالىق اكسياسى بارىسىندا جينالعان قوقىستار قايتا وڭدەۋ ورتالىقتارىنا جىبەرىلەتىن بولادى. جاستاردىڭ جوسپارىنا سايكەس، قايتا وڭدەۋدەن تۇسكەن قاراجات 1 ماۋسىم – بالالار كۇنى مەرەكەسىنە وراي، بۇلدىرشىندەرگە مەرەكەلىك كوڭىل-كۇي سىيلاۋعا جۇمسالاتىن بولادى.
